ലണ്ടന്‍: യൂറോകപ്പിന്റെ തീ പാറുന്ന പോരാട്ടങ്ങള്‍ക്ക് ഇന്ന് തുടക്കമാകുന്നു. ടൂര്‍ണമെന്റിലെ പ്രീക്വാര്‍ട്ടര്‍ മത്സരങ്ങള്‍ക്കാണ് ഇന്ന് വിസില്‍ മുഴങ്ങുന്നത്. ഇന്ന് നടക്കുന്ന ആദ്യ മത്സരത്തില്‍ വെയില്‍സ് ഡെന്‍മാര്‍ക്കിനെയും രണ്ടാം മത്സരത്തില്‍ ഇറ്റലി ഓസ്ട്രിയയേയും നേരിടും.
ഗ്രൂപ്പ് എയിലെ മൂന്ന് മത്സരവും ജയിച്ച് ഒന്‍പത് പോയിന്റുമായി ഗ്രൂപ്പ് ചാംപ്യന്‍മാരായാണ് ഇറ്റലി പ്രീക്വാര്‍ട്ടര്‍ ഉറപ്പിച്ചത്. ഗ്രൂപ്പിലെ വെയിന്‍സ്, സ്വിറ്റ്‌സര്‍ലന്‍ഡ്, തുര്‍ക്കി എന്നിവരില്‍ നിന്ന് അസൂറികള്‍ക്ക് കാര്യമായ സമ്മര്‍ദം നേരിടേണ്ടി വന്നില്ല. മൂന്ന് മത്സരത്തില്‍ ഏഴ് ഗോളുകള്‍ സ്വന്തമാക്കിയ ഇറ്റലിയുടെ പോസ്റ്റിലേക്ക് ഒരു ഗോള്‍ പോലും വീണിട്ടില്ല. ബൊനൂച്ചിയും കെല്ലിനിയും നയിക്കുന്ന പ്രതിരോധത്തെ തകര്‍ക്കാന്‍ ഇതുവരെ ആര്‍ക്കും കഴിഞ്ഞിട്ടില്ല. ഏറ്റവും ശക്തരായ പ്രതിരോധനിരക്കൊപ്പം അവസരത്തിനൊത്തുയരുന്ന മുന്നേറ്റനിരയുമാണ് ഇറ്റലിയുടെ ഇപ്പോഴത്തെ കരുത്ത്. എന്നാല്‍ പരുക്കേറ്റ കെല്ലിനി ഇന്നത്തെ മത്സരത്തില്‍ കളിക്കുമോ എന്ന കാര്യം സംശയമാണ്. മറ്റൊരു പ്രതിരോധ താരം അലസാന്‍ഡ്രോ ഫ്‌ളോറന്‍സിയും പരുക്കേറ്റ് പുറത്താണ്. 2008ലായിരുന്നു ഇതിന് മുന്‍പ് ഓസ്ട്രിയയും ഇറ്റലിയും തമ്മില്‍ ഏറ്റുമുട്ടിയത്. അന്ന് 2 - 2 എന്ന സ്‌കോറിന് മത്സരം അവസാനിച്ചു.
അതേസമയം മികച്ച ആത്മവിശ്വാസവുമായാണ് ഓസ്ട്രിയയും വരുന്നത്. മൂന്ന് മത്സരത്തില്‍ രണ്ട് ജയവും ഒരു തോല്‍വിയുമാണ് ഓസ്ട്രിയയുടെ സമ്പാദ്യം. ഹോളണ്ടിനെതിരേയായിരുന്നു രണ്ട് ഗോളിന്റെ തോല്‍വി ഏറ്റുവാങ്ങിയത്. ആദ്യ മത്സരത്തില്‍ നോര്‍ത്ത് മാസിഡോണിയയെ 3-1 ന് പരാജയപ്പെടുത്തിയ ഓസ്ട്രിയ ഫോം തുടര്‍ന്നു. അവസാന മത്സരത്തില്‍ ഉക്രൈനെ എതിരില്ലാത്ത ഒരു ഗോളിനും പരാജയപ്പെടുത്തി. ടൂര്‍ണമെന്റില്‍ ഏറ്റവും ഒത്തിണക്കത്തോടെ കളിച്ച ടീമുകളിലൊന്നായിരുന്നു ഓസ്ട്രിയ. അതിനാല്‍ ഇന്ന് അസൂറികളെ നേരിടുമ്പോള്‍ മികച്ച ഒത്തിണക്കത്തോടെയുള്ള മത്സരം പ്രതീക്ഷിക്കാം. ഡേവിഡ് അലാബ നേതൃത്വം നല്‍കുന്ന പ്രതിരോധ നിരയും ബോം ഗാര്‍ട്ട്‌നറും കലാസിച്ചും ലെയ്‌നറും ശക്തി പകരുന്ന മുന്നേറ്റനിരയും ഓസ്ട്രിയയുടെ പ്രതീക്ഷകളാണ്. രാത്രി 12.30 വെംബ്ലി സ്റ്റേഡിയത്തിലാണ് മത്സരം.