തിരുവനന്തപുരം: എ.കെ.ജി സെന്റര്‍ ആക്രമണം നടന്ന് 12 ദിവസമായിട്ടും പ്രതികളെ പറ്റി സൂചനയില്ലല്ലോ എന്ന ചോദ്യത്തിന് മറുപടി നല്‍കി എല്‍ഡിഎഫ് കണ്‍വീനര്‍ ഇ പി ജയരാജന്‍. സുകുമാരക്കുറുപ്പ് പോയിട്ട് കാലമെത്രയായി ഇതുവരെ പിടിച്ചോ എന്ന മറുചോദ്യമാണ് ജയരാജന്‍ ഉന്നയിച്ചത്. പലരും മാറിമാറി ഭരിച്ചില്ലേ? എന്നിട്ട് പിടിച്ചോ? എത്രയെത്ര കേസുകള്‍ ഇങ്ങനെയുണ്ടെന്നും അദ്ദേഹം ആരാഞ്ഞു.

എ.കെ.ജി സെന്റര്‍ അന്വേഷണം നല്ലരീതിയില്‍ പൊലിസ് അന്വേഷിക്കുന്നുണ്ട്. പിന്നെ കക്കാന്‍ അറിയുന്നവര്‍ക്കും നില്‍ക്കാനും അറിയാം. ഇത്തരം കുറ്റകൃത്യങ്ങള്‍ ചെയ്യുന്നവര്‍ രക്ഷപ്പെടാനുള്ള വഴികളും സ്വീകരിച്ചുകാണും. ജയരാജന്‍ പറഞ്ഞു. അതേസമയം എ കെ ജി സെന്റര്‍ ആക്രമണത്തിന് പിന്നില്‍ ജയരാജനാണെന്ന് കെപിസിസി അധ്യക്ഷന്‍ കെ സുധാകരന്റെ ആരോപണത്തിന് അയാളെ പോലെ തരം താഴാന്‍ ഇല്ലെന്ന മറുപടിയാണ് ജയരാജന്‍ നല്‍കിയത്.

നടി ആക്രമിക്കപ്പെട്ട കേസില്‍ ദിലീപിന് അനുകൂലമായുള്ള മുന്‍ ഡിജിപി ശ്രീലേഖയുടെ പ്രസ്താവന നിയമ വിദഗ്ദര്‍ തന്നെ പരിശോധിക്കും. സര്‍ക്കാര്‍ ചെയ്യേണ്ട കാര്യങ്ങള്‍ സര്‍ക്കാര്‍ ചെയ്യും. കോടതിയുടെ പരിഗണനയിലിരിക്കുന്ന വിഷയമാണ്. താന്‍ ആര്‍ക്കെങ്കിലും എതിരായോ അനുകൂലമായോ ഒന്നും പറയുന്നില്ല.

പഴയ ഉന്നത ഉദ്യോഗസ്ഥര്‍ ബിജെപിക്ക് വേണ്ടി മത്സരിക്കുന്ന കാലമാണ്.വിരമിച്ചാല്‍ അവര്‍ വ്യക്തികളാണ് എന്നും ഇ പി ജയരാജന്‍ പറഞ്ഞു.