Ola S1 Electric Scooter Price Hiked Following FAME-II Subsidy Reduction

ബംഗളുരു ആസ്ഥാനമായുള്ള ഇലക്ട്രിക് സ്‌കൂട്ടര്‍ കമ്പനിയായ ഓല ഇലക്ട്രിക് സ്‌കൂട്ടറുകളുടെ വില വര്‍ധിപ്പിച്ചു. രാജ്യത്ത് ഇലക്ട്രിക്, ഹൈബ്രിഡ് വാഹനങ്ങള്‍ പ്രോത്സാഹിപ്പിക്കുന്നതിനായി കേന്ദ്രസര്‍ക്കാര്‍ കൊണ്ടുവന്ന ഫെയിം(FAME) പദ്ധതി പ്രകാരമുള്ള സബ്‌സിഡി കുറച്ചതാണ് വര്‍ധനയ്ക്ക് കാരണം. സബ്‌സിഡി കുറച്ചതോടെ ഇലക്ട്രിക് വാഹന നിര്‍മാതാക്കള്‍ പതിയെ വില വര്‍ധനവ് പ്രഖ്യാപിച്ചിരിക്കുകയാണ്.

ഏകദേശം 15,000 രൂപയാണ് ഓല വര്‍ധിപ്പിച്ചിരിക്കുന്നത്. ഇതോടെ ഓല ഇലക്ട്രിക് ഓല എസ്1ന്റെ വില 1,14,999 രൂപയില്‍ നിന്നും 1,29,999 രൂപയിലേക്ക് ഉയര്‍ന്നു. 84,999 രൂപയുണ്ടായിരുന്ന ഓല എസ്1എയറിന്റെ വില 99,999 രൂപയാക്കിയിട്ടുണ്ട്. എസ്1 സീരീസിലെ ഏറ്റവും ഉയര്‍ന്ന മോഡലായ ഓല എസ്1 പ്രൊയുടെ വില 1,24,999 രൂപയില്‍ നിന്നും 1,39,999 രൂപയായും കൂട്ടി.

കഴിഞ്ഞ മെയ് 21 നാണ് പുതുക്കിയ FAME II നിബന്ധനകള്‍ പ്രകാരം കേന്ദ്ര ഹെവി ഇന്‍ഡസ്ട്രീസ് ഇലക്ട്രിക് സ്‌കൂട്ടറുകള്‍ക്കുള്ള സബ്‌സിഡി കിലോവാട്ടിന് 15000 രൂപയെന്നത് 10000 രൂപയാക്കി കുറയ്ക്കുന്നത്. പരിസ്ഥിതി സൗഹൃദ വാഹനങ്ങളുടെ ഉല്‍പ്പാദനവും വില്‍പനയും പ്രോത്സാഹിപ്പിക്കുന്നതിനായി കേന്ദ്ര സര്‍ക്കാര്‍ 2015ലാണ് ഫെയിം പദ്ധതി അവതരിപ്പിച്ചത്. 2019 ഏപ്രില്‍ ഒന്നിന് ആരംഭിച്ച ഫെയിമിന്റെ രണ്ടാം ഘട്ടം 2024 മാര്‍ച്ച് 31 ന് അവസാനിക്കാനിരിക്കുകയാണ്.

FAME II പദ്ധതി പ്രകാരം 4kWh ബാറ്ററിയുള്ള ഒല എസ്1 പ്രോക്ക് പരമാവധി 59,550 രൂപ സബ്‌സിഡിക്കാണ് അര്‍ഹതയുള്ളത്. വാഹനത്തിന്റെ എക്‌സ് ഷോറൂം വിലയുടെ പരമാവധി 15% മാത്രമേ സബ്‌സിഡി നല്‍കാനാവൂ എന്ന പുതിയ ചട്ടമാണ് വൈദ്യുത സ്‌കൂട്ടറുകളുടെ വില കൂട്ടുന്നത്. നേരത്തെ ഇത് 40% ആയിരുന്നു. ഇതോടെ എസ്1ന് 44,700 രൂപ സബ്‌സിഡി ലഭിച്ചിരുന്നത് 20,678 രൂപയായി കുറയുകയായിരുന്നു.

ഓലയും ഏഥറുമടക്കം വില വര്‍ധനവ് പ്രഖ്യാപിച്ചപ്പോള്‍ അതില്‍ നിന്ന് വ്യത്യസ്തമായ നിലപാട് സ്വീകരിച്ചിരിക്കുകയാണ് ഹീറോ ഇലക്ട്രിക്. സബ്‌സിഡി കുറച്ചാലും തങ്ങള്‍ ഇവികള്‍ക്ക് വില കൂട്ടില്ലെന്നാണ് ഹീറോ ഇലക്ട്രിക്കിന്റെ നിലപാട്.