പാലക്കാട്: മതേതരത്വമാണു ലോകത്തെ നയിക്കുന്നതെന്ന സന്ദേശം ജനങ്ങളിലേക്കെത്തിക്കേണ്ടതു ചലച്ചിത്ര, മാധ്യമ പ്രവര്‍ത്തകരുടെ കടമയാണെന്നു സംവിധായകന്‍ പി.ടി. കുഞ്ഞുമുഹമ്മദ്. പാലക്കാട് പ്രസ്‌ക്ലബ് ഫിലിം സൊസൈറ്റിയും ലൈബ്രറി കൗണ്‍സിലും നെഹ്‌റു ഗ്രൂപ്പ് ഓഫ് ഇന്‍സ്റ്റിറ്റൂഷന്‍സുമായി സഹചരിച്ചു നടത്തുന്ന  പ്രസ്‌ക്ലബ് നെഹ്‌റു ദേശീയ ഹ്രസ്വചിത്ര മേള ഉദ്ഘാടനം ചെയ്യുകയായിരുന്നു അദ്ദേഹം.വെറുമൊരു കംപ്യൂട്ടര്‍ കൊണ്ട് ഒരു ചലച്ചിത്രം നിര്‍മിക്കാനും അതു ലോകമാകെ പ്രദര്‍ശിപ്പിക്കാനും ഇന്നു സാധിക്കും. ഇതു നന്നായി പ്രയോജനപ്പെടുത്തുന്നതു ഹ്രസ്വചിത്ര സംവിധായകരാണ്. അതിനാല്‍ തന്നെ ഈ രംഗത്തേക്കു കൂടുതല്‍ പേര്‍ പ്രായഭേദമന്യേ കടന്നുവരും. ഏറെ അവഗണന ഏറ്റവുവാങ്ങുന്ന ദലിത് സമൂഹത്തിന്റെ ഉയര്‍ച്ചയ്ക്കും ചലച്ചിത്ര പ്രവര്‍ത്തകര്‍ മുന്‍കയ്യെടുക്കണം. 'വിശ്വാസപൂര്‍വം. മന്‍സൂര്‍' എന്ന പുതിയ ചിത്രത്തിന്റെ പണിപ്പുരയിലാണു താനെന്നും പി.ടി. കുഞ്ഞുമുഹമ്മദ് പറഞ്ഞു.
പ്രസ്‌ക്ലബ് പ്രസിഡന്റ് അരുണ്‍ ശ്രീധര്‍ അധ്യക്ഷനായി. നെഹ്‌റു ഗ്രൂപ്പ് ഓഫ് ഇന്‍സ്റ്റിറ്റൂഷന്‍സ് സെക്രട്ടിയും സി.ഇ.ഒയുമായ ഡോ.പി.കൃഷ്ണകുമാര്‍, ലൈബ്രറി കൗണ്‍സില്‍ സെക്രട്ടറി എം. കാസിം, ടി.ആര്‍. അജയന്‍, ജൂറി അംഗങ്ങളായ ചലച്ചിത്ര നിരൂപകന്‍ ജി.പി. രാമചന്ദ്രന്‍, തിരക്കഥാകൃത്ത് സതീഷ് രാമകൃഷ്ണന്‍, എഴുത്തുകാരി എം.ബി. മിനി, കെ.കെ. മുസ്തഫ, ഫെസ്റ്റിവല്‍ ഡയറക്ടര്‍ ആര്‍. ശശിശേഖര്‍, പ്രസ്‌ക്ലബ് സെക്രട്ടറി സി.ആര്‍. ദിനേശ് പ്രസംഗിച്ചു.