ദുബൈ: നാളെ (ഞായറാഴ്ച) നടക്കുന്ന നീറ്റ് (നാഷണല്‍ എലിജിബിലിറ്റി എന്‍ട്രന്‍സ് ടെസ്റ്റ്-യു.ജി). പരീക്ഷയ്ക്കായി യു.എ.ഇ.യിലെ മൂന്ന് കേന്ദ്രങ്ങള്‍ ഒരുങ്ങി. അബുദബി ഇന്ത്യന്‍ സ്‌കൂള്‍,ദുബൈ ഇന്ത്യന്‍ സ്‌കൂള്‍, ഷാര്‍ജ ഇന്ത്യ ഇന്റര്‍നാഷണല്‍ സ്‌കൂളുകളിലാണ് പരീക്ഷയെന്ന് നാഷണല്‍ ടെസ്റ്റിങ് ഏജന്‍സി (എന്‍.ടി.എ.) ഇന്ത്യ പ്രഖ്യാപിച്ചതായി ദുബൈ ഇന്ത്യന്‍ കോണ്‍സുലേറ്റ് അറിയിച്ചു.
യു.എ.ഇയില്‍ ആദ്യമായി നീറ്റ് പരീക്ഷ നടന്ന കഴിഞ്ഞ വര്‍ഷം ദുബൈ ഇന്ത്യന്‍ ഹൈസ്‌കൂള്‍ മാത്രമായിരുന്നു കേന്ദ്രം. ഞായറാഴ്ച ഉച്ചയ്ക്ക് യു.എ.ഇ.സമയം 12.30 മുതല്‍ 3.50 വരെ പെന്‍ ആന്‍ഡ് പേപ്പര്‍ മോഡിലാണ് പരീക്ഷ.
മൂന്ന് മണിക്കൂറും 20 മിനിറ്റും ആയിരിക്കും പരീക്ഷാ ദൈര്‍ഘ്യം. പരീക്ഷാ കേന്ദ്രങ്ങളില്‍ വിദ്യാര്‍ഥികളുടെ റിപ്പോര്‍ട്ടിങ് സമയം രാവിലെ 9.30 മുതല്‍ ഉച്ചയ്ക്ക് 12 വരെയായിരിക്കും. വിദ്യാര്‍ഥികള്‍ക്ക് പരീക്ഷാ കേന്ദ്രങ്ങളിലേക്കുള്ള അവസാന പ്രവേശനം ഉച്ചയ്ക്ക് 12 വരെയാണ്. പരീക്ഷയുമായി ബന്ധപ്പെട്ട വിവരങ്ങള്‍ക്ക് http://neet.nta.nic.in ഉപയോഗപ്പെടുത്താം.