ദുബൈ: തീ കത്തിയ മണത്തെ തുടര്‍ന്ന് മസ്‌ക്കറ്റിലിറക്കിയ എയര്‍ ഇന്ത്യ എക്സ്പ്രസ് വിമാനം യാത്രക്കാരുമായി ദുബൈയിലെത്തി. കരിപ്പൂരില്‍നിന്ന് ദുബൈയിലേക്ക് പുറപ്പെട്ട എയര്‍ ഇന്ത്യ എക്സ്പ്രസ് എ.എക്‌സ് 355 വിമാനമാണ് തീ കത്തിയ മണം ഉയര്‍ന്നതിനെ തുടര്‍ന്ന് പുലര്‍ച്ചെ മസ്‌ക്കറ്റിലിറക്കിയത്. ഫോര്‍വേഡ് ഗാലറിയില്‍നിന്നാണ് തീ കത്തിയ മണമുണ്ടായെന്ന് ഡി.ജി.സി.എ അറിയിച്ചിരുന്നു. വിമാനത്തിലെ യാത്രക്കാരെ മസ്‌ക്കറ്റ് വിമാനത്താവളത്തില്‍ സുരക്ഷിതമായി ഇറക്കിയ ശേഷം എന്‍ജിനിയര്‍മാര്‍ വിമാനം പരിശോധിക്കുകയായിരുന്നു. തുടര്‍നടപടികള്‍ക്ക് ശേഷം അഞ്ച് മണിക്കൂറിലേറെ വൈകി യാത്രക്കാരെ അതേ വിമാനത്തില്‍ ദുബൈയിലെത്തിക്കുകയായിരുന്നു.