കണ്ണൂരിൽ ലോറി ഡ്രൈവർ കുത്തേറ്റു മരിച്ചു

കണ്ണൂർ: കണ്ണൂരിൽ ഇന്ന് പുലർച്ചെ ലോറി ഡ്രൈവർ കുത്തേറ്റു മരിച്ചു. ടൗൺ പൊലിസ് സ്റ്റേഷന് സമീപത്ത് വെച്ചാണ് കുത്തേറ്റ കണിച്ചാർ സ്വദേശി വി.ഡി. ജിന്‍റോ (39) യാണ് കൊല്ലപ്പെട്ടത്. കുത്തേറ്റ ജിന്‍റോ റോഡിൽ കിടന്ന് ചോര വാർന്നാണ് മരിച്ചത്. പ്രതിയെ കണ്ടെത്തിയിട്ടില്ല. മാർക്കറ്റിൽ ഇറക്കാനുള്ള ലോഡുമായി എത്തിയതായിരുന്നു ജിന്‍റോ.

ഇന്ന് പുലർച്ചെ മൂന്ന് മണിയോടെയാണ് സംഭവം. വലതുകാലിന് വെട്ടേറ്റ ജിന്റോ പൊലിസ് സ്റ്റേഷന്റെ ഭാഗത്തേക്ക് ഓടി രക്ഷപ്പെടാനുള്ള ശ്രമത്തിനിടെ കുഴഞ്ഞുവീഴുകയായിരുന്നു. റോഡിൽ കുഴഞ്ഞ് വീണ് ഒരുപാട് സമയം കിടന്നെങ്കിലും സമീപത്തെ സ്റ്റേഷനിലെ പൊലിസുകാർ ഉൾപ്പെടെ ആരും കാണാതിരുന്നതിനാൽ ജീവൻ രക്ഷിക്കാനായില്ല.

കണ്ണൂർ സ്‌റ്റേഡിയത്തിന് സമീപത്ത് ലോറി ഡ്രൈവർമാർ പതിവായി വാഹനം പാർക്കു ചെയ്യാറുണ്ട്. ഇവിടെയുണ്ടായ എന്തെങ്കിലും തർക്കമാകാം കൊലപാതകത്തിലേക്ക് നയിച്ചതെന്നാണ് കരുതുന്നത്. സംഭവത്തിൽ പൊലിസ് അന്വേഷണം തുടങ്ങി.