കൊല്ലം • നീറ്റ് പരീക്ഷയെഴുതാനെത്തിയ വിദ്യാർഥിനികളുടെ അടിവസ്ത്രം അഴിപ്പിച്ചതായി പരാതി. ആയൂർ മാർത്തോമ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ആൻഡ് ടെക്നോളജിയിൽ പരീക്ഷക്കെത്തിയ വിദ്യാർഥിനികൾക്കാണ് ദുരനുഭവം. പരീക്ഷാ കേന്ദ്രത്തിലെ പ്രവേശന കവാടത്തിൽ ഉദ്യോഗസ്ഥർ വിദ്യാർഥിനികളുടെ അടിവസ്ത്രം അഴിച്ചുപരിശോധിച്ചു. മെറ്റൽ ഡിറ്റക്ടർ ഉപയോഗിച്ചുള്ള പരിശോധനയിൽ വസ്ത്രത്തിൽ ലോഹ വസ്തു കണ്ടെന്ന് പറഞ്ഞായിരുന്നു ഇത്. അപമാനിതയായ ശൂരനാട് സ്വദേശിനിയായ വിദ്യാർഥിനിയുടെ രക്ഷകർത്താവ് കൊട്ടാരക്കര ഡിവൈ.എസ്.പിക്ക് പരാതി നൽകി.

ഇവിടെ പരീക്ഷയ്‌ക്കെത്തിയ ഭൂരിഭാഗം വിദ്യാർഥിനികൾക്കും സമാന അനുഭവമുണ്ടായതായി രക്ഷിതാവ് ആരോപിച്ചു. സെന്ററിന്റെ ഗേറ്റ് കടന്നപ്പോൾ ഒരു വനിതാ ഉദ്യോഗസ്ഥ കുട്ടിയെ തടഞ്ഞ് സ്‌കാനർ ഉപയോഗിച്ച് പരിശോധിച്ചു. അടിവസ്ത്രം മുഴുവൻ ഊരിവയ്ക്കണമെന്ന് നിർദേശിക്കുകയും ചെയ്തു. ഇത് ഉൾക്കൊള്ളാൻ കഴിയാതെ കുട്ടി കരഞ്ഞു. തുടർന്ന് മറ്റൊരു ഉദ്യോഗസ്ഥൻ മാതാവിനെ വിളിച്ച് ഷാൾ ആവശ്യപ്പെടുകയും അത് ധരിച്ച് കുട്ടി ഹാളിൽ പ്രവേശിക്കുകയുമായിരുന്നു. മാനസികാഘാതത്തിൽനിന്ന് കുട്ടി മുക്തയായിട്ടില്ലെന്ന് പിതാവ് പറഞ്ഞു. അപമാനിക്കപ്പെട്ടതിൻ്റെയും പരീക്ഷ വേണ്ട രീതിയിൽ എഴുതാൻ പറ്റാതെ പോയതിൻ്റെയും സങ്കടത്തിലാണ് മകളെന്നും ഇനിയുമാർക്കും ദുരവസ്ഥ ഉണ്ടാവരുതെന്നു കരുതിയാണ് പരാതിയുമായി മുന്നോട്ടുപോകുന്നെന്നും പിതാവ് പറഞ്ഞു.

സംഭവത്തിൽ പങ്കില്ലെന്നും നീറ്റ് നിയോഗിച്ച ഏജൻസിയാണ് പരിശോധിച്ചതെന്നും കോളജ് അധികൃതർ വിശദീകരിച്ചു. ചടയമംഗലം പൊലിസ് വിദ്യാർഥിനിയുടെ മൊഴിയെടുത്തു. അന്വേഷിക്കാൻ ഉത്തരവ്
സംഭവത്തിൽ മനുഷ്യാവകാശ കമ്മിഷൻ കേസെടുത്ത് അന്വേഷണത്തിന് ഉത്തരവിട്ടു. കൊല്ലം റൂറൽ എസ്.പി അന്വേഷിച്ച് 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മിഷൻ അംഗം വി.കെ ബീനാകുമാരി നിർദേശിച്ചു.