'വിസയ്ക്ക് ലഹരി പരിശോധന പരിഗണനയില്‍

പുതിയ വിസയിലെത്തുന്നവര്‍ക്ക് ലഹരിരഹിത പരിശോധന നടത്താന്‍ പദ്ധതിയിട്ട് കുവൈത്ത്. പരിശോധനയില്‍ ലഹരി മരുന്ന് ഉപയോഗിക്കുന്നവരെ കണ്ടെത്തി നാടുകടത്താനാണ് നീക്കമെന്നാണ് റിപ്പോര്‍ട്ട്. വിസ പുതുക്കുന്നവര്‍ക്കും പരിശോധന നിര്‍ബന്ധമാക്കിയേക്കും. ആരോഗ്യ,ആഭ്യന്തര മന്ത്രാലയങ്ങള്‍ സംയുക്തമായാണ് പദ്ധതി ആസൂത്രണം ചെയ്യുക.

ലഹരിമരുന്ന് നിര്‍മാര്‍ജനം ചെയ്യാനും വ്യാപനം പരിമിതപ്പെടുത്താനും ലക്ഷ്യമിട്ടാണ് നടപടി. ആരോഗ്യ, സുരക്ഷാ വിദഗ്ധര്‍ ചേര്‍ന്നു തയ്യാറാക്കിയ ആശയത്തിന് മന്ത്രിതല കൗണ്‍സില്‍ അംഗീകാരം നല്‍കി. ക്രിമിനല്‍ എവിഡന്‍സ് ഡിപ്പാര്‍ട്ട്‌മെന്റുമായി ഏകോപിപ്പിച്ച് പരിശോധനയ്ക്കായി പ്രത്യേക സംവിധാനവും ഒരുക്കും.

വിസയ്ക്ക് മുന്‍പുള്ള ആരോഗ്യപരിശോധനയില്‍ ലഹരി രഹിത പരിശോധനയും ഉള്‍പ്പെടുത്താനാണ് ആലോചിക്കുന്നത്. കൂടാതെ സംശയിക്കപ്പെടുന്ന താമസക്കാരേയും പരിശോധിക്കും. ജനങ്ങളുടെ ബയോമെട്രിക് ഫയലുകള്‍ പൂര്‍ത്തിയാക്കുന്നതോടൊപ്പം പഠനത്തിനും ചര്‍ച്ചയ്ക്കും ശേഷമായിരിക്കും അന്തിമതീരുമാനം.