കേരളത്തില്‍ ഇന്നും ശക്തമായ മഴ; അഞ്ച് ജില്ലകളില്‍ യെല്ലോ അലര്‍ട്ട്

തിരുവനന്തപുരം: കേരളത്തില്‍ കനത്ത മഴ ഇന്നും തുടരും. ആലപ്പുഴ, എറണാകുളം, തൃശൂര്‍, കോഴിക്കോട്, കണ്ണൂര്‍ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. കേരളാ തീരത്ത് ശക്തമായ കടലാക്രമണത്തിന് സാധ്യതയുണ്ട്. അപകട മേഖലകളില്‍ നിന്ന് മാറിത്താമസിക്കണമെന്നാണ് നിര്‍ദേശം. 16ാം തിയതി വരെ ഇടിമിന്നലിന് സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി.

അതേസമയം തിരുവനന്തപുരം പൊഴിയൂരിലുണ്ടായ രൂക്ഷമായ കടലാക്രമണത്തില്‍ നിരവധി വീടുകള്‍ തകര്‍ന്നു. കൊല്ലംകോട് ഭാഗത്തെ ഒരു കിലോമീറ്ററോളം റോഡ് പൂര്‍ണമായും കടലെടുത്തു. ഇന്നലെ വൈകുന്നേരം ആറ് മണിയോടെയാണ് പൊഴിയൂരില്‍ ശക്തമായ കടലാക്രമണം ഉണ്ടായത്. എഴുപതിലധികം വീടുകളില്‍ വെള്ളം കയറി. ആറ് വീടുകള്‍ പൂര്‍ണമായും പത്തിലേറെ വീടുകള്‍ ഭാഗികമായും തകര്‍ന്നതായി നാട്ടുകാര്‍ പറഞ്ഞു.

കടലാക്രമണത്തെ തുടര്‍ന്ന് ആളുകളെ പൊഴിയൂര്‍ ഗവണ്‍മെന്റ് യു.പി സ്‌കൂളിലേക്ക് മാറ്റാനുള്ള ശ്രമം നടത്തിയെങ്കിലും വൈദ്യുതി ഇല്ലാതിരുന്നത് തിരിച്ചടിയായി. വീട്ടില്‍ വെള്ളം കയറിയതിനെ തുടര്‍ന്ന് ആളുകള്‍ ബന്ധുവീടുകളിലേക്ക് മാറി. ശക്തമായ മഴയും ഉയര്‍ന്ന തിരമാലയും കഴിഞ്ഞ ദിവസങ്ങളില്‍ പ്രദേശത്ത് ഉണ്ടായിരുന്നു. കൊല്ലംകോട് നിന്ന് തമിഴ്‌നാട് അതിര്‍ത്തിയായ നീരോടിയിലേക്കുള്ള റോഡ് പൂര്‍ണമായും കടലെടുത്തു. കൊല്ലംകോട്, പരുത്തിയൂര്‍ വരെയുള്ള തീരങ്ങളിലെ വീടുകളിലാണ് കടല്‍ കയറിയത്. ശക്തമായ കടല്‍ക്ഷോഭത്തെ തുടര്‍ന്ന് പ്രദേശത്തെ തീരം പകുതിയിലധികവും നേരത്തെ കടലെടുത്തിരുന്നു.