മലപ്പുറത്ത് വിവിധ ഇടങ്ങളിൽ ഭൂചലനം

മലപ്പുറം: മലപ്പുറത്ത് വിവിധ ഭാഗങ്ങളിൽ ഭൂചലനം ഉണ്ടയതായി വിവരം. തിങ്കളാഴ്ച രാത്രി എട്ടോടെയാണ് നേരിയ ഭൂചലനം ഉണ്ടായത്. മലപ്പുറം നഗരസഭ പരിധിയിലെ കോട്ടപ്പടി, കുന്നുമ്മൽ, മേൽമുറി, വലിയങ്ങാടി, കാവുങ്ങൽ, ഇത്തിൾ പറമ്പ്​, വാറ​ങ്കോട്​, കൈനോട്​, താമരക്കുഴി തുടങ്ങിയ ഭാഗങ്ങളിലാണ്​ ഭൂചലനം അനുഭവപ്പെട്ടത്. എന്നാൽ ഉണ്ടായത് ഭൂചലനമാണോ എന്ന് ഔദ്യോഗികമായി സ്ഥിരീകരിച്ചിട്ടില്ല.

ഭൂചലനം ഉണ്ടായെന്ന് കരുതുന്ന ഇടങ്ങളിൽ പ്രശ്നങ്ങൾ ഒന്നും തന്നെ ഇതുവരെ റിപ്പോർട്ട് ചെയ്തിട്ടില്ല. രാത്രി എട്ടിനും എട്ടരക്കും ഇടയിലായാണ് വിവിധ ഇടങ്ങളിൽ സംഭവം ഉണ്ടായത്. അസാധാരണ രീതിയിലുള്ള വലിയ ശബ്​ദവും വിറയലും അനുഭവപ്പെട്ടതായാണ്​ നാട്ടുകാർ പറയുന്നത്​. ആളുകൾ പരസ്പരം വിവരം കൈമാറിയതോടെയാണ് ഒരുപാട് സ്ഥലങ്ങളിൽ ഇതേഅനുഭവം ഉണ്ടായതായി വ്യക്തമായത്.

അതേസമയം, സംഭവിച്ചത്​ ഭൂചലനമാണോ എന്നതിൽ ഔദ്യോഗിക സ്ഥിരീകരണം വന്നിട്ടില്ല. പരിശോധനക്ക് ശേഷമാകും ഇതിന്റെ സ്ഥിരീകരണം വരുക. നഗരസഭ പരിധിയിലെ വിവധയിടങ്ങളിൽ ഭൂചലനം അനുഭവപ്പെട്ടതായി ചിലർ അറിയിച്ചെന്നും നാശനഷ്ടങ്ങളൊന്നും റി​പ്പോർട്ട്​ ചെയ്തിട്ടില്ലെന്നും നഗരസഭ ചെയർമാൻ മുജീബ്​ കാടേരി അറിയിച്ചു.