പൊന്മുടിയില്‍ കാര്‍ കൊക്കയിലേക്ക് മറിഞ്ഞു; വിനോദയാത്രക്കെത്തിയ നാലംഗ സംഘത്തെ രക്ഷപ്പെടുത്തി

തിരുവനന്തപുരം: പൊന്മുടിയില്‍ 22ാം വളവില്‍ ഫോറസ്റ്റ് ഓഫിസിന് സമീപം കാര്‍ കൊക്കയിലേക്ക് മറിഞ്ഞ് അപകടം. അഞ്ചല്‍ സ്വദേശികളായ നവജോത്, ആദില്‍, അമല്‍, ഗോകുല്‍ എന്നിവര്‍ സഞ്ചരിച്ച കാറാണ് അപകടത്തില്‍പെട്ടത്. നാലുപേരും അത്ഭുതകരമായി രക്ഷപ്പെട്ടു. 300 മീറ്റര്‍ താഴ്ച്ചയിലേക്കാണ് കാര്‍ മറിഞ്ഞത്.

പൊന്മുടി സന്ദര്‍ശിച്ച ശേഷം തിരിച്ചിറങ്ങുമ്പോള്‍ കാര്‍ കൊക്കയിലേക്ക് മറിയുകയായിരുന്നുവെന്നാണ് വിവരം. പൊന്മുടിയില്‍ കനത്ത മൂടല്‍മഞ്ഞും മഴയുമുണ്ടായിരുന്നു. ഇതാവാം അപകടകാരണമെന്നാണ് കരുതുന്നത്. ബ്രേക്ക് നഷ്ടപ്പെട്ട് കൊക്കയിലേക്ക് മറിയുകയായിരുന്നുവെന്ന് സംഘത്തിലുണ്ടായിരുന്നയാള്‍ പറഞ്ഞു.

രക്ഷപ്പെടുത്തിയവരില്‍ രണ്ട് പേര്‍ക്ക് ഗുരുതരമല്ലാത്ത പരുക്കേറ്റിട്ടുണ്ട്.