ഡെലിവറി ബൈക്കുകളുടെ ചീറിപ്പാച്ചിൽ; പൂട്ടിട്ട് യുഎഇ, ഡെലിവറി ബോയ് ആകാൻ ഇനി പരീക്ഷ

അബുദാബി: അബുദാബിയിലെ ഗതാഗത സുരക്ഷയുടെ ഭാഗമായി ഡെലിവറി ബൈക്കുകൾക്ക് പുതിയ നിയന്ത്രണം ഏർപ്പെടുത്തി റോഡ് സുരക്ഷയ്‌ക്കായുള്ള സംയുക്ത സമിതി. ഇനി മുതൽ ഡെലിവറി മോട്ടോർസൈക്കിൾ യാത്രക്കാർക്ക് മണിക്കൂറിൽ 100 കിലോമീറ്ററോ അതിനുമുകളിലോ വേഗത പരിധിയുള്ള റോഡുകളിൽ വലത് പാത മാത്രമേ ഉപയോഗിക്കാൻ അനുമതിയൊള്ളൂ.

അബുദാബി മുനിസിപ്പാലിറ്റികളുടെയും ഗതാഗത വകുപ്പിന്റെയും അധ്യക്ഷതയിൽ, ഇന്റഗ്രേറ്റഡ് ട്രാൻസ്‌പോർട്ട് സെന്റർ, അബുദാബി പോലീസിന്റെ ജനറൽ കമാൻഡ്, ഹെൽത്ത് ഡിപ്പാർട്ട്‌മെന്റ് എന്നിവ ചേർന്ന് നടത്തിയ യോഗത്തിലാണ് തീരുമാനം.

ഡെലിവറി മോട്ടോർസൈക്കിൾ യാത്രക്കാരുടെ അപകടകരമായ ഡ്രൈവിംഗ് പരിമിതപ്പെടുത്തി റോഡുകളിലെ ഗതാഗതം നിയന്ത്രിക്കുന്നതിനും എല്ലാ റോഡ് ഉപയോക്താക്കൾക്കും ഉയർന്ന സുരക്ഷ നിലനിർത്തുന്നതിനും ലക്ഷ്യമിട്ടാണ് പദ്ധതിയെന്ന് സംയുക്ത സമിതി വ്യക്തമാക്കി.

തിരക്കുള്ള റോഡുകളിലും ഹൈവേകളിലും ട്രാഫിക്, റോഡ് നിർദ്ദേശങ്ങൾ, സിഗ്നലുകൾ എന്നിവ അവഗണിക്കുക, റോഡിന്റെ തെറ്റായ വശത്തുകൂടി വാഹനമോടിക്കുന്നതിനു പുറമേ, പെട്ടെന്നുള്ള ലെയ്ൻ വളച്ചൊടിക്കൽ, ടേൺ-സിഗ്നലുകൾ ശരിയായി ഉപയോഗിക്കാത്തതും ടേണിംഗും ലെയ്ൻ തിരിയുന്നതും ഉൾപ്പെടെ നിരവധി നിയമലംഘനങ്ങളാണ് ഡെലിവറി ബൈക്കർമാർ ചെയ്യുന്നത്. ഇത് പലപ്പോഴും അപകടങ്ങൾക്ക് കാരണമാകുന്നുണ്ട്.

ഈ മേഖലയിൽ പ്രവർത്തിക്കുന്ന ഡ്രൈവർമാർക്കും മോട്ടോർ സൈക്കിൾ യാത്രക്കാർക്കും യോഗ്യത, വിദ്യാഭ്യാസം, തുടർച്ചയായ പരിശീലനം എന്നിവ നൽകിക്കൊണ്ട് ഡെലിവറി മേഖലയിൽ പ്രവർത്തിക്കുന്ന കമ്പനികളുമായി പങ്കാളിത്തം വികസിപ്പിക്കുന്നതിനുള്ള ഒരു സംരംഭവും പദ്ധതിയിൽ ഉൾക്കൊള്ളുന്നു.

ഇന്റഗ്രേറ്റഡ് ട്രാൻസ്‌പോർട്ട് സെന്റർ (ഐടിസി) ഡെലിവറി മോട്ടോർസൈക്കിൾ യാത്രക്കാർക്കായി ഒരു പരിശീലന പരിപാടി വികസിപ്പിച്ചെടുക്കുകയും അബുദാബിയിൽ പ്രവർത്തിക്കുന്ന വിവിധ ഡെലിവറി കമ്പനികളിൽ നിന്നുള്ള സൂപ്പർവൈസർമാർക്ക് ഇന്റേൺഷിപ്പ് പ്രോഗ്രാം നടപ്പിലാക്കുകയും ചെയ്തിട്ടുണ്ട്.

തുടർന്ന്, സൂപ്പർവൈസർമാർ അവരുടെ ഡ്രൈവർമാർക്കായി പരിശീലന പരിപാടികൾ സംഘടിപ്പിക്കാൻ തുടങ്ങി. ഓരോ പരിശീലന പരിപാടിയുടെയും അവസാനം, ഡ്രൈവർമാർ ഒരു എഴുത്ത് പരീക്ഷയ്ക്ക് വിധേയരാകും. ഇത് പ്രകാരമാകും ഇനി മുതൽ ഡെലിവറി ബൈക്കുകൾ ഓടിക്കാനുള്ള യോഗ്യത നേടുക.

അതേസമയം, പദ്ധതി പ്രകാരം ഡ്രൈവർമാർക്ക് വിശ്രമിക്കാനുള്ള പ്രത്യേക ഇടങ്ങളും ജീവിതം മെച്ചപ്പെടുത്താനുള്ള മറ്റു പദ്ധതികളും ആവിഷ്കരിച്ചിട്ടുണ്ട്.