ഇനി വീടുകളിൽ ഇരുന്ന് ചെക്ക് ഇന്‍ ചെയ്യാം; ഹോം ചെക്ക് ഇന്‍ സർവീസ് ഒരുക്കി അബുദാബി

അബൂദബി: വിമാനത്താവളത്തിലെ തിരക്ക് ഒഴിവാക്കാൻ ഹോം ചെക്ക് ഇന്‍ സർവീസ് ഒരുക്കി അബുദാബി. സ്വന്തം വീടുകളില്‍ നിന്ന് തന്നെ ചെക്ക് ഇന്‍ നടപടികള്‍ പൂര്‍ത്തീകരിച്ച് ബാഗുകള്‍ നല്‍കി ബോര്‍ഡിങ് കാര്‍ഡ് സ്വീകരിക്കാവുന്ന പദ്ധതിയാണ് ഹോം ചെക്ക് ഇന്‍. മൊറാഫിക്ക് ഏവിയേഷന്‍ സര്‍വീസാണ് ഈ പദ്ധതിക്ക് തുടക്കം കുറിച്ചിരിക്കുന്നത്.

യാത്രാ സമയത്തിന്റെ 24 മണിക്കൂര്‍ മുൻപ് മൂത്ത അഞ്ച് മണിക്കൂര്‍ മുൻപ് വരെയാണ് ഈ സേവനം ഉപയോഗിക്കാൻ സാധിക്കുക. മുന്‍കൂട്ടി ബുക്ക് ചെയ്യുന്നതിന് അവസരം ലഭ്യമാണ്. യാത്രക്കാരന്റെ സൗകര്യപ്രദമായ സമയത്തിന് അനുസരിച്ച് ബുക്ക് ചെയ്യാം. ആന്‍ഡ്രോയിഡിലും, ഐഒഎസിലും ലഭിക്കുന്ന മൊറാഫിക് എന്ന ആപ്ലിക്കേഷന്‍ വഴിയാണ് സേവനം ബുക്ക് ചെയ്യേണ്ടത്.

മൊറാഫിക്ക് ഏവിയേഷന്റെയും എത്തിഹാദ് ഗ്രൗണ്ട് സര്‍വീസിന്റെയും ജീവനക്കാര്‍ വീടുകളില്‍ എത്തി സേവനം ഉറപ്പാക്കും. യാത്രക്കാരുടെ ബാഗുകള്‍ സുരക്ഷിതമായി അബൂദബി വിമാനത്താവളത്തില്‍ എത്തുമെന്നതിനാൽ വിമാനത്താവളത്തിലേക്ക് പുറപ്പെടുമ്പോൾ ഇനി വലിയ ലഗേജ് ചുമന്ന് പോകേണ്ട. ബാഗുകളുടെ എണ്ണത്തിന്റെ അടിസ്ഥാനത്തിലാകും നിരക്ക് ഈടാക്കുന്നത്.

രണ്ട് ബാഗുകള്‍ വരെ ചെക്ക് ഇന്‍ ചെയ്യുന്നതിന് 185 ദിര്‍ഹവും മൂന്നു മുതല്‍ നാല് ബാഗുകള്‍ ചെക്ക് ഇന്‍ ചെയ്യുന്നതിന് 220 ദിര്‍ഹവും അഞ്ച് മുതല്‍ ആറ് ബാഗുകള്‍ക്ക് 280 ദിര്‍ഹവും ഏഴ് മുതല്‍ എട്ട് ബാഗുകള്‍ക്ക് 340 ദിര്‍ഹവുമാണ് നിരക്ക്. ഒരു കുടുംബത്തിലെ മുഴുവന്‍ അംഗങ്ങളുടെയും ചെക്ക് ഇന്‍ നടപടികള്‍ ഇതേ നിരക്കില്‍ പൂര്‍ത്തീകരിക്കാന്‍ സാധ്യമാകും.

എത്തിഹാദ് വിമാനത്തില്‍ യാത്ര ചെയ്യുന്നവര്‍ക്കാണ് തുടക്കത്തില്‍ സേവനം നല്‍കുക. മറ്റു വിമാനക്കമ്പനികള്‍ക്കുള്ള ഇതേ സേവനം താമസിയാതെ ആരംഭിക്കും.