സിലിണ്ടറില്‍ ഗ്യാസിന് പകരം പച്ചവെള്ളം; പരാതിയുമായി വീട്ടമ്മ

പാലക്കാട്: പാചകവാതക സിലിണ്ടറിനുള്ളില്‍ ഗ്യാസിന് പകരം പച്ചവെള്ളം. ചേലക്കര തിരുവില്വാമല കുത്താമ്പുളിയിലാണ് പാചകത്തിനായി നിറച്ച ഗ്യാസ് സിലിണ്ടറിനുള്ളില്‍ വെള്ളം കണ്ടെത്തിയത്. തിരുവില്വാമല കുത്താമ്പുള്ളി വലിയവീട്ടില്‍ ലക്ഷ്മിയുടെ വീട്ടിലാണ് 3 ആഴ്ച മുമ്പ് ഇന്ത്യന്‍ ഗ്യാസ് കമ്പനിയുടെ ഒറ്റപ്പാലം തോട്ടക്കര സത്യം ഏജന്‍സിയില്‍ നിന്നും ഗ്യാസ് കൊണ്ടുവച്ചത്. 1150 രൂപ നല്‍കി നിറച്ച സിലിണ്ടര്‍ രണ്ട് ദിവസത്തെ ഉപയോഗത്തിന് ശേഷം നിശ്ചലമാവുകയായിരുന്നു.

'രാവിലെ എഴുന്നേറ്റ് അരിയിട്ട് ഇത്തിരി കഴിഞ്ഞപ്പോള്‍ തന്നെ തീ കത്തുന്നത് നിന്നു. അതില്‍ നിന്ന് എന്തോ ശബ്ദവുമുണ്ടായിരുന്നു. പിന്നാലെ ഗ്യാസ് ഏജന്‍സിയില്‍ അറിയിച്ചപ്പോള്‍ അവര്‍ വന്നു. അവര്‍ വന്നിട്ട് ഗ്യാസ് സിലിണ്ടര്‍ കുലുക്കി നോക്കിയിട്ട് പറഞ്ഞു വെള്ളമാണെന്ന്. പിന്നീട് നടത്തിയ അന്വേഷണത്തിലാണ് ഗ്യാസ് കുറ്റിയില്‍ പച്ചവെള്ളം നിറച്ചതായി കണ്ടെത്തിയത്. ഏജന്‍സി സമീപിച്ചപ്പോള്‍ തങ്ങള്‍ക്ക് ഉത്തരവാദിത്തം ഇല്ലെന്ന് അറിയിച്ചതായി വീട്ടുകാര്‍ പറയുന്നു.