മലപ്പുറം: റവന്യൂ - പൊലിസ് വിഭാഗം വിവിധ കേസുകളുമായി ബന്ധപ്പെട്ട് പിടിച്ചെടുത്ത വാഹങ്ങളുടെ കണക്കെടുപ്പ് യുദ്ധകാലാടിസ്ഥാനത്തില്‍ പൂര്‍ത്തിയാക്കാന്‍ ജില്ലാ കലക്ടര്‍ എ. ഷൈനാമോളുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. കലക്റ്ററേറ്റ് ശുചീകരണവും മാലിന്യ സംസ്‌കരണവുമായി ബന്ധപ്പെട്ട് വിളിച്ച് ചേര്‍ത്ത ഡെപ്യൂട്ടി കലക്റ്റര്‍മാരുടെയും ജൂനിയര്‍ സൂപ്രണ്ടുമാരുടെയും യോഗത്തിലാണ് തീരുമാനം.  സിവില്‍ സ്റ്റേഷനകത്തും പൊലീസ് സ്റ്റേഷനുകളുടെ പരിസരത്തും റോഡരികിലും റവന്യൂ വകുപ്പിന്റെ ഡംബിങ് യാര്‍ഡുകളിലും കൂടികിടക്കുന്ന വാഹനങ്ങള്‍ പരിശോധിക്കാന്‍ നിയോഗിച്ച റവന്യൂ - പൊലീസ് മോട്ടോര്‍ വാഹന വകുപ്പ് പ്രതിനിധികളടങ്ങുന്ന സംഘം യുദ്ധകാലാടിസ്ഥാനത്തില്‍ ഇതിനായി പ്രവര്‍ത്തിക്കും.  പൊളിച്ച് മാറ്റാന്‍ പറ്റുന്ന വാഹനങ്ങള്‍, കോടതി നടപടികളിലുള്‍പ്പെട്ട വാഹനങ്ങള്‍ എന്നിവയുടെ പട്ടിക തയ്യാറാക്കും.  ഗ്രീന്‍ - ക്ലീന്‍ കാംപസ് പദ്ധതിയുടെ ഭാഗമായി ടൗണ്‍ പ്ലാനിങ് വിഭാഗം 30നകം പൂര്‍ത്തിയാക്കുന്ന മാസ്റ്റര്‍ പ്ലാന്‍ യാഥാര്‍ഥ്യമാക്കണമെങ്കില്‍ വാഹനങ്ങള്‍ നീക്കം ചെയ്യേണ്ടതാണെന്ന് യോഗം വിലയിരുത്തി.  
    കലക്റ്ററേറ്റിലെ വിവിധ സെക്ഷനുകളിലെ പേപ്പര്‍ വെയ്സ്റ്റും ഇ-വെയ്സ്റ്റും നീക്കം ചെയ്യുന്നതിന്റെ ഭാഗമായി 27നകം ഉപയോഗ ശൂന്യമായവയുടെ പട്ടിക തയ്യാറാക്കും. തീര്‍പ്പാക്കിയ ഫയലുകളും ഇലക്ഷനുമായി ബന്ധപ്പെട്ട രജിസ്റ്ററുകളും റിക്കാര്‍ഡ് റൂമിലേയ്ക്ക് മാറ്റാനും വിവിധ ബ്ലോക്കുകളില്‍ ബയോഗാസ് പ്ലാന്റ് സ്ഥാപിക്കുന്നതിനുള്ള സാധ്യതകളും യോഗം ചര്‍ച്ച ചെയ്തു. സിവില്‍ സ്റ്റേഷന്‍ പരിസരം ശുചീകരിക്കാനും മാലിന്യങ്ങള്‍ യഥാസമയം സംസ്‌കരിക്കാനും ജീവനക്കാര്‍ ബാധ്യസ്ഥരാണെന്ന് കലക്ടര്‍ അറിയിച്ചു. രണ്ടു ദിവസങ്ങളിലായി കലക്റ്ററേറ്റിലെ വിവിധ ഓഫീസുകള്‍ കലക്ടര്‍ സന്ദര്‍ശിച്ചിരുന്നു.