തിരൂര്‍: മലയാളസര്‍വകലാശാലയില്‍ പുതുതായി ഉദ്ഘാടനം ചെയ്ത ലൈബ്രറി നേരില്‍ കാണാന്‍ എം.ടി വാസുദേവന്‍ നായര്‍ എത്തി. വൈസ് ചാന്‍സലര്‍  കെ. ജയകുമാര്‍, രജിസ്ട്രര്‍ കെ.എം. ഭരതന്‍, അക്കാദമിക് ഡീന്‍ ഡോ. എം ശ്രീനാഥന്‍, മലയാളവിഭാഗം മേധാവി ഡോ. പി. അനിതകുമാരി, പ്രൊഫ. ദേശമംഗലം രാമകൃഷ്ണന്‍, പ്രൊഫ. മധു ഇളവങ്കര തുടങ്ങിയവര്‍ ചേര്‍ന്ന് അദ്ദേഹത്തെ സ്വീകരിച്ചു. ലൈബ്രറി ഉപദേഷ്ടാവ് പി ജയരാജന്‍ പൊന്നാട അണിയിച്ചു.  
പുസ്തകങ്ങള്‍ കണ്ടശേഷം ലൈബ്രറിയിലെ ആധുനിക സൗകര്യങ്ങളും അദ്ദേഹം ചുറ്റിനടന്നുകണ്ടു. എം.ടിക്ക് ലൈബ്രറിയില്‍ ഓണററി അംഗത്വം സമ്മാനിച്ചശേഷം സര്‍വകലാശാല പ്രസിദ്ധീകരിച്ച പുസ്തകങ്ങള്‍ വൈസ് ചാന്‍സലര്‍ കൈമാറി. ലൈബ്രറികള്‍ അനുദിനം വളരുന്ന ജൈവപ്രതിഭാസമാണെന്ന് എം.ടി പറഞ്ഞു. അഭ്യുദയകാംഷികളില്‍ നിന്ന് കൂടുതല്‍ പുസ്തകങ്ങള്‍ സ്വീകരിച്ച് ലൈബ്രറി ഇനിയും വികസിപ്പിക്കാന്‍ കഴിയുമെന്ന് അദ്ദേഹം പ്രത്യാശ പ്രകടിപ്പിച്ചു.