ഇന്ദിരാഭവനിൽ നിന്ന് ചൊവ്വാഴ്ച അർധരാത്രി പിന്നിട്ട് ജഗതിയിലെ പുതുപ്പള്ളി വീട്ടിലേക്ക് അവസാനമായി കൊണ്ടുവന്നപ്പോഴും ചേതനയറ്റ ഉമ്മൻചാണ്ടിയെ കാണാൻ അണമുറിയാതെ ഒഴുകി ജനത.
പ്രഭാത പ്രാർഥനകൾക്കു ശേഷം വിലാപയാത്ര പുറപ്പെടുമ്പോഴേക്കും അവരുടെ സങ്കടം അണപൊട്ടിയൊഴുകി. നിറപുഷ്പങ്ങളാൽ പ്രത്യേകം അലങ്കരിക്കപ്പെട്ട കെ.എസ്.ആർ.ടി.സി ബസിലേക്ക് ഉമ്മൻചാണ്ടിയുടെ കുടുംബത്തെ കൈപിടിച്ച് കയറ്റുമ്പോൾ കെ.സി വേണുഗോപാൽ, കെ.സുധാകരൻ, വി.ഡി സതീശൻ, രമേശ് ചെന്നിത്തല, എം.എം ഹസൻ തുടങ്ങിയ നേതാക്കൾ കരഞ്ഞില്ലെന്നേയുള്ളൂ.

മറിയാമ്മയും ചാണ്ടി ഉമ്മനും മറിയവും അച്ചുവും കയറിയതിന് പിന്നാലെ വി.ഡി സതീശൻ, രമേശ് ചെന്നിത്തല, ബെന്നി ബെഹനാൻ, ഡീൻ കുര്യാക്കോസ്, കെ.സി ജോസഫ്, പി.സി വിഷ്ണുനാഥ്, ഷാഫി പറമ്പിൽ, അൻവർ സാദത്ത്, കെ.എം അഭിജിത്ത്, എം.എം ഹസൻ തുടങ്ങിയവരും കെ.എസ്.ആർ.ടി.സി ബസിലേക്ക് കയറി.
തുടർച്ചയായി 53 വർഷം സാമാജികനായി നിറഞ്ഞു നിന്ന കേരള നിയമസഭാ മന്ദിരത്തിന് മുന്നിലൂടെ വിലാപയാത്ര കടന്നുപോകുമ്പോൾ ആ രാജവീഥിയിൽ ജനസാഗരം നിറഞ്ഞു.

ഉമ്മൻചാണ്ടിയെന്ന പേര് തങ്കലിപികളാൽ രേഖപ്പെടുത്തപ്പെട്ടിട്ടുള്ള നിയമസഭയുടെ കവാടത്തിനകത്തും പുറത്തും അണിചേർന്നു നിന്ന് ഉദ്യോഗസ്ഥരും ജീവനക്കാരും നാട്ടുകാരും ഉമ്മൻചാണ്ടിക്ക് വിട നൽകി. വിലാപയാത്ര പട്ടം ജങ്ഷൻ പിന്നിടുമ്പോൾ ആയിരങ്ങൾ ആർത്തലച്ചെത്തി മുദ്രാവാക്യം വിളികളോടെ അഭിവാദ്യമർപ്പിച്ചു. കേശവദാസപുരം ജങ്ഷൻ പിന്നിട്ട് വാഹനം 1970 മുതൽ ഉമ്മൻചാണ്ടി രാവും പകലും യാത്ര ചെയ്ത എം.സി റോഡിലേക്ക് കടക്കുമ്പോഴേക്കും അനുഗമിക്കുന്ന വാഹനങ്ങളുടെ നിര പിന്നെയും നീണ്ടു.

നാലാഞ്ചിറിയിലെത്തുമ്പോഴേക്കും കനത്ത മഴ. തുള്ളിക്കൊരുകുടം പോലെ പെയ്ത മഴയ്ക്കും വഴിയരികിൽ കാത്തുനിന്നവരെ അകറ്റാനായില്ല. അവിടെ ജനം തിങ്ങിക്കൂടിയതോടെ വിലാപയാത്രയുടെ സഞ്ചാരം കൂടുതൽ മന്ദഗതിയിലായി. മണ്ണന്തല പിന്നിടുന്നതുവരെ യാത്രയുടെ വേഗം പരമാവധി കുറഞ്ഞു. തിരുവനന്തപുരം നഗരം പിന്നിടാൻ നാലു മണിക്കൂറും നാൽപത് മിനിട്ടുമെടുത്തു.

Content Highlights:Today's Article About Oomen chandy 2