കൊടകര: സീറോ മലബാര്‍ സഭയുടെ അഞ്ചു ദിവസം നീളുന്ന മേജര്‍ ആര്‍ക്കി എപ്പിസ്‌കോപ്പല്‍ അസംബ്ലിക്ക് നാളെ കൊടകര സഹൃദയ എന്‍ജിനീയറിങ് കോളജ് അങ്കണത്തില്‍ തുടക്കമാവും. വൈകീട്ട് അഞ്ചിന് സീറോ മലബാര്‍ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരിയുടെ മുഖ്യ കാര്‍മികത്വത്തില്‍ അര്‍പ്പിക്കുന്ന ദിവ്യബലിയോടെയാണ് അസംബ്ലിക്ക് തുടക്കമാവുന്നു. തുടര്‍ന്ന് ഇന്ത്യയിലെ വത്തിക്കാന്‍ സ്ഥാനപതി ആര്‍ച്ച്ബിഷപ്പ് ഡോ.സാല്‍വത്തോരെ പെനാക്കിയോ അസ്സംബ്ലി ഉദ്ഘാടനം ചെയ്യും.
കെ.ആര്‍.എല്‍.സി.സി പ്രസിഡന്റ് ആര്‍ച്ച് ബിഷപ് ഡോ. എം.സൂസപാക്യം, മലങ്കര ഓര്‍ത്തോഡോക്‌സ് സുറിയാനി സഭയുടെ മദ്രാസ് മെത്രോപോലീത്ത ഡോ. യൂഹാനോന്‍ മാര്‍ ഡയസ്‌കോറോസ്, ദേശീയ മനുഷ്യാവകാശ കമ്മീഷന്‍ ആക്ടിങ് ചെയര്‍മാന്‍ ജസ്റ്റിസ് സിറിയക് ജോസഫ് എന്നിവര്‍ പങ്കെടുക്കും. സീറോ മലബാര്‍ സിനഡ് സെക്രട്ടറി മാര്‍ ബോസ്‌കോ പുത്തൂര്‍ റിപ്പോര്‍ട് അവതരിപ്പിക്കും. അഞ്ചു വര്‍ഷത്തിലൊരിക്കല്‍ ആണ് ആര്‍ക്കി എപ്പിസ്‌കോപ്പല്‍ അസംബ്ലി കൂടുന്നത്. ഇതാദ്യമായാണ് സീറോ മലബാര്‍ സഭയുടെ എപ്പിസ്‌കോപ്പല്‍ അസ്സംബ്ലിക്ക് സഭയുടെ ആസ്ഥാനമായ കാക്കനാട് മൌണ്ട് സെന്റ് തോമസിന് പുറത്തു വേദി ഒരുങ്ങുന്നത്. 21 രാജ്യങ്ങളില്‍ നിന്നായി 515 പ്രതിനിധികള്‍ ഇത്തവണത്തെ അസംബ്ലിക്ക് പങ്കെടുക്കും.  ജീവിതത്തിലെ ലാളിത്യം, കുടുംബത്തിലെ സാക്ള്‍ഷ്യം, പ്രവാസികളുടെ ദൗത്യം എന്നിവയാണ് അസംബ്ലിയുടെ മുഖ്യ വിഷയങ്ങള്‍. അസ്സംബ്ലി  ഓഗസ്റ്റ് 28 ന് സമാപിക്കും.