ഇംഫാല്‍: മണിപ്പൂരിന്റെ തലസ്ഥാനമായ ഇംഫാലിലെ സൂപ്പര്‍മാര്‍ക്കറ്റില്‍ ഷോപ്പിങ് നടത്തുകയായിരുന്ന യുവതിയോട് ലൈംഗികാതിക്രമം നടത്തിയ ബി.എസ്.എഫ് ജവാന് സസ്‌പെന്‍ഷന്‍.ബോര്‍ഡര്‍ സെക്യൂരിറ്റി ഫോഴ്‌സിലെ ഹെഡ് കോണ്‍സ്റ്റബിളായ സതീഷ് പ്രസാദിനെയാണ് യുവതിയോട് അപമര്യാദയായി പെരുമാറിയതിന്റെ പേരില്‍ സസ്‌പെന്‍ഷന്‍ നേരിടേണ്ടി വന്നത്. ഇക്കഴിഞ്ഞ 20നാണ് ഇംഫാലിലെ പടിഞ്ഞാറന്‍ പ്രവിശ്യയിലെ ഒരു മാളില്‍ വെച്ച് യുവതിക്ക് സൈനികന്റെ പക്കല്‍ നിന്നും ദുരനുഭവം നേരിടേണ്ടി വന്നത്. തുടര്‍ന്ന് യുവതി പരാതി നല്‍കുകയും ചെയ്തിരുന്നു.

യുവതിക്കെതിരെ സൈനികന്‍ മോശമായ രീതിയില്‍ ഇടപെടുന്ന ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതിനെ തുടര്‍ന്ന് വലിയ രീതിയില്‍ വിമര്‍ശനങ്ങള്‍ ഉയര്‍ന്നിരുന്നു. സംസ്ഥാനത്ത് കത്തിപ്പടരുന്ന കലാപം നിയന്ത്രിക്കാന്‍ ചുമതലപ്പെടുത്തപ്പെട്ട സൈനികന്റെ ഭാഗത്ത് നിന്നുമാണ് ഇത്തരത്തിലുളള പെരുമാറ്റം ഉണ്ടായത്.ലഭിച്ച പരാതികളുടെ അടിസ്ഥാനത്തില്‍ സൈന്യം അന്വേഷണം നടത്തി സൈനികനെ സസ്‌പെന്‍ഡ് ചെയ്യുകയായിരുന്നു. കൂടാതെ ഇയാള്‍ക്കെതിരെ കോര്‍ട്ട് ഓഫ് എന്‍ക്വയറി നടപടികള്‍ ആരംഭിച്ചതായി ബി.എസ്.എഫും അറിയിച്ചു.

Content Highlights:bsf jawan gropes woman grocery store suspended