യുഎഇ പ്രസിഡന്റിന്റെ സഹോദരൻ ഷെയ്ഖ് സയീദ് അന്തരിച്ചു; രാജ്യത്ത് മൂന്ന് ദിവസത്തെ ദുഃഖാചരണം

അബുദാബി: യുഎഇ പ്രസിഡന്റിന്റെ സഹോദരൻ ഷെയ്ഖ് സയീദ് ബിൻ സായിദ് അൽ നഹ്യാന്‍ അന്തരിച്ചു. ആരോഗ്യ സംബന്ധമായ പ്രശനങ്ങൾ തുടർന്ന് ചികിത്സയിലിരിക്കെയാണ് മരണം. പ്രസിഡൻഷ്യൽ കോടതിയാണ് മരണവാർത്ത പുറത്തുവിട്ടത്. മരണത്തെ തുടർന്ന് ഇന്ന് മുതൽ മൂന്ന് ദിവസത്തേക്ക് യുഎഇയിൽ ഔദ്യോഗിക ദുഃഖാചരണം പ്രഖ്യാപിച്ചിട്ടുണ്ട്. 29 വരെ യുഎഇ ദേശീയ പതാക പകുതി താഴ്ത്തിക്കെട്ടും.

അബുദാബി ഭരണാധികാരിയുടെ ഷെയ്ഖ് സായിദ് ബിൻ സുൽത്താൻ അൽ നഹ്യാന്റെ പ്രതിനിധിയായിരുന്നു അന്തരിച്ച ഷെയ്ഖ് സയീദ് ബിൻ സായിദ് അൽ നഹ്യാന്‍. പ്രതിനിധിയായി നിരവധി ഔദ്യോഗിക രാജ്യാന്തര സന്ദർശനങ്ങൾ നടത്തിയിട്ടുണ്ട്. വിയോഗത്തിൽ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ അനുശോചിച്ചു.

ദിവസങ്ങളായി ആരോഗ്യ പ്രശ്നങ്ങൾ അലട്ടിയിരുന്ന അദ്ദേഹത്തിന്റെ മരണം അപ്രതീക്ഷിതമായിരുന്നു. ജൂലൈ 22 ന് അദ്ദേഹത്തിന് ഗുരുതരമായി രോഗം ബാധിച്ച വിവരം പുറത്തിവിട്ടിരുന്നു. അദ്ദേഹത്തിന്റെ ആരോഗ്യത്തിന് വേണ്ടി പ്രാർത്ഥിക്കാനും പ്രസിഡൻഷ്യൽ കോടതി അന്ന് ജനങ്ങളോട് അഭ്യർത്ഥിച്ചിരുന്നു. എന്നാൽ ഇന്ന് രാവിലെ അദ്ദേഹം മരിച്ചതായി പ്രസിഡൻഷ്യൽ കോടതി തന്നെ അറിയിക്കുകയായിരുന്നു.

1965ൽ അൽഐനിൽ ആയിരുന്നു ഷെയ്ഖ് സയീദ് ജനിച്ചത്. 1988ൽ യുഎഇ സർവകലാശാലയിൽ നിന്ന് പൊളിറ്റിക്കൽ സയൻസിൽ ബിരുദം നേടി. ശേഷം അബുദാബിയിലെ ആസൂത്രണ വകുപ്പിന്റെ അണ്ടർസെക്രട്ടറിയായി നിയമിതനായി. 1991 മുതൽ 1996 വരെ തുറമുഖ വകുപ്പിന്റെ ചെയർമാനായി പ്രവർത്തിച്ചിട്ടുണ്ട്. 2002 നും 2003 നും ഇടയിൽ യുഎഇ ഫുട്ബോൾ അസോസിയേഷന്റെ പ്രസിഡന്റ് സ്ഥാനവും വഹിച്ചിരുന്നു.