ഫോട്ടോ എടുക്കുന്നതിനിടെ കാല്‍വഴുതി പുഴയില്‍ വീണ് നവദമ്പതികളെ കാണാതായി

തിരുവനന്തപുരം: ഫോട്ടോ എടുക്കുന്നതിനിടെ കാല്‍വഴുതി പുഴയില്‍ വീണ് നവദമ്പതികളെ കാണാതായി. ഇവര്‍ക്കൊപ്പം പുഴയില്‍ വീണ ബന്ധുവായ യുവാവ് മരിച്ചു. തിരുവനന്തപുരം ജില്ലയിലെ പള്ളിക്കലില്‍ വൈകീട്ട് അഞ്ച് മണിയോടെയാണ് സംഭവം.

കടയ്ക്കല്‍ കുമ്മിള്‍ സ്വദേശി സിദ്ദിഖ് ഭാര്യ നൗഫി എന്നിവരാണ് പള്ളിക്കല്‍ ആറ്റിലേക്ക് വീണത്. ഇവര്‍ക്കൊപ്പം പുഴയിലേക്ക് വീണ ബന്ധുവായ അന്‍സിലിനെ കരയ്ക്ക് എത്തിച്ചെങ്കിലും ജീവന്‍ രക്ഷിക്കാനായില്ല.

അഞ്ചു ദിവസം മുമ്പായിരുന്നു ഇരുവരുടെയും വിവാഹം. ബന്ധുവായ അന്‍സിലിന്റെ വീട്ടില്‍ വിരുന്നിനെത്തിയതായിരുന്നു ഇരുവരും. പാറയുടെ മുകളില്‍ നിന്ന് ഫോട്ടോ എടുക്കുന്നതിനിടെ കാല്‍ വഴുതുകയായിരുന്നു. തെരച്ചില്‍ രാത്രി വൈകിയും തുടരുകയാണ്.