ഇനി വൈകിയാല്‍ പിഴ കിട്ടും; ആദായ നികുതി റിട്ടേണ്‍ ഫയല്‍ ചെയ്യാനുള്ള അവസാന ദിവസം ഇന്ന്

ആദായ നികുതി റിട്ടേണ്‍ സമര്‍പ്പിക്കാനുള്ള അവസാന തിയതി ഇന്നാണ്. രാത്രി 12 മണിവരെയാണ് പിഴ കൂടാതെ ജനങ്ങള്‍ക്ക് ടാക്‌സ് റിട്ടേണ്‍ അടക്കാന്‍ കഴിയുക. സമയ പരിധി നീട്ടുന്നതിനെ കുറിച്ച് ഇതുവരെ യാതൊരു സൂചനയും സര്‍ക്കാരിന്റെ ഭാഗത്ത് നിന്ന് ഉണ്ടായിട്ടില്ല. അതുകൊണ്ട് തന്നെ ഭീമമായ തുക പിഴ വരേണ്ടെങ്കില്‍ ഓണ്‍ലൈനായെങ്കിലും റിട്ടേണ്‍ അടച്ച് തീര്‍ത്തോളൂ. അവസാന ദിവസം ആദായ നികുതി വകുപ്പിന്റെ സൈറ്റില്‍ തിരക്ക് ഉണ്ടാവാനുള്ള സാധ്യതയും കൂടുതലാണ്. എന്നാല്‍ പോര്‍ട്ടലില്‍ തകരാര്‍ സംഭവിച്ചാലും നാളെ തൊട്ട് പിഴ നല്‍കേണ്ടി വരുമെന്നാണ് റിപ്പോര്‍ട്ട്. അഞ്ച് കോടിയിലധികം പേരാണ് ഇതിനോടകം ടാക്‌സ് റിട്ടേണ്‍ ഫയല്‍ ചെയ്തിട്ടുള്ളത്.

നികുതി റിട്ടേണ്‍ ഫയല്‍ ചെയ്യാന്‍ സാധിച്ചില്ലെങ്കില്‍ ഐ.ടി നിയമങ്ങള്‍ അനുസരിച്ച് 10,000 രൂപ വരെയാണ് പിഴ ഈടാക്കുന്നത്. ആദായ നികുതി നിയമം 1961 ലെ സെക്ഷന്‍ 234 എയിലെ വ്യവസ്ഥകള്‍ അനുസരിച്ച്, മറ്റ് പിഴകള്‍ക്ക് പുറമെ നികുതി ചുമത്താവുന്ന വരുമാനത്തിന് പലിശയും വകുപ്പിന് ഈടാക്കാം. അതിനാല്‍ അക്കൗണ്ടുകള്‍ ഓഡിറ്റ് ചെയ്യേണ്ടതില്ലാത്ത ശമ്പളമുള്ളവരും വരുമാനമുള്ളവരുമായ വ്യക്തികള്‍ ഇന്ന് രാത്രിക്ക് മുമ്പ് അടച്ച് തീര്‍ക്കുന്നതാണ് നല്ലത്.

ആധാര്‍ കാര്‍ഡ് നമ്പര്‍, പാന്‍ കാര്‍ഡ് നമ്പര്‍, തൊഴിലുടമയില്‍ നിന്നുള്ള ഫോം-16, വീട് വാടക രസീതുകള്‍, ഭവന വായ്പ സംബന്ധിച്ച വിവരങ്ങള്‍, ബാങ്ക് പാസ്ബുക്ക്, സ്ഥിര നിക്ഷേപം, പോസ്റ്റ് ഓഫീസ് സേവിംഗ്‌സ് പാസ്ബുക്ക് എന്നീ രേഖകള്‍ റിട്ടേണ്‍ ഫയല്‍ ചെയ്യാനായി സമര്‍പ്പിക്കണം.