രഹസ്യ വ്യാപാരം നടത്തുന്നവർക്കെതിരെ കർശന നടപടിയുമായി ഒമാൻ; ബിനാമികൾക്ക് 15000 റിയാല്‍ പിഴ

മസ്‌കത്ത്: ബിനാമി ഇടപാടുകൾക്ക് കൂച്ചുവിലങ്ങാനൊരുങ്ങി ഒമാൻ ഭരണകൂടം. രാജ്യത്തെ നിയമം അനുവദിക്കാത്ത തരത്തിൽ രഹസ്യ വ്യാപാരം നടത്തുന്നവർക്കെതിരെ കർശന നടപടിയെടുക്കുമെന്ന് ഭരണകൂടം അറിയിച്ചു. പുതിയ മന്ത്രിതല ഉത്തരവിലാണ് ബിനാമി ഇടപാടുകൾക്കെതിരെ കർശന നടപടിക്ക് ശുപാർശ ചെയ്യുന്നത്. നിയമലംഘനം പിടിക്കപ്പെട്ടാല്‍ മന്ത്രാലയം പിഴയും തടവും ഉൾപ്പെടെയുള്ള നടപടികളിലേക്ക് കടക്കും.

ബിനാമി ഇടപാടുകൾ നടത്തിയാൽ മൂന്ന് ഘട്ടമായ നടപടികൾ എടുക്കുക. ആദ്യഘട്ടത്തിൽ നിയമലംഘനം പിടിട്കൂടിയാൽ, വാണിജ്യ റജിസ്റ്ററില്‍ നിന്ന് സ്ഥാപനത്തിന്റെ പ്രവര്‍ത്തനം റദ്ദാക്കുകയും, 5000 റിയാല്‍ പിഴ അടപ്പിക്കുകയും ചെയ്യും. വീണ്ടും നിയമ ലംഘനം നടത്തിയാല്‍ പതിനായിരം റിയാല്‍ പിഴയും മൂന്ന് മാസത്തേക്ക് പ്രവര്‍ത്തനം സസ്‌പെന്‍ഡ് ചെയ്യുകയും ചെയ്യും. മൂന്നാം തവണ നിയമലംഘനം നടത്തിയാല്‍ 15000 റിയാല്‍ പിഴയും വാണിജ്യ റജിസ്റ്ററില്‍ നിന്ന് നീക്കം ചെയ്യുകയും ചെയ്യും. മൂന്നാം തവണ പിടികൂടിയാൽ ഇതിന് ശേഷം ഒരു വർഷം കഴിഞ്ഞ് മാത്രമേ വീണ്ടും രജിസ്റ്റര്‍ ചെയ്യാനാകൂ എന്നും മന്ത്രാലയം ഉത്തരവില്‍ പറയുന്നു.

സ്വന്തം നിലക്കോ മറ്റുള്ളവരുമായി ചേര്‍ന്നോ ബിനാമി വ്യാപാരം നടത്തിയാലും ശിക്ഷലഭിക്കും. സ്ഥാപനത്തിന്റെ വരുമാനം, ലാഭം തുടങ്ങിയ പ്രത്യക്ഷമായോ പരോക്ഷമായോ സ്ഥാപനത്തിന്റെ അക്കൗണ്ടിലേക്കല്ലാതെ സ്വകാര്യ വ്യക്തിയുടെ അക്കൗണ്ടിലേക്കോ മറ്റേതെങ്കിലും അക്കൗണ്ടിലേക്കോ മാറ്റുന്നത് സ്വകാര്യ വ്യാപാരത്തിന്റെ പരിധിയില്‍ വരും. അതിനാൽ ഇത്തരം ഇടപാട് നടത്തിയാലും പിടിയിലാകും.

രഹസ്യ വ്യാപാരം സംബന്ധിച്ച് ശ്രദ്ധയിൽ പെട്ടാൽ റിപ്പോര്‍ട്ട് ചെയ്യാനും കേസുകള്‍ കുറക്കാനും ജനങ്ങളെ പ്രോത്സാഹിപ്പിക്കുന്നതിന് മന്ത്രാലയം പരസ്യം ഉൾപ്പെടെയുള്ളവ നൽകും. ജനങ്ങളുടെ സഹകരണത്തോടെ ഈ നിയമലംഘനം അവസാനിപ്പിക്കാനാണ് സർക്കാർ ശ്രമം. രഹസ്യ വ്യാപാരം നടത്തുന്നയാളെ നിയമപ്രകാരം മറഞ്ഞിരിക്കുന്ന വ്യക്തിയായാണ് കണക്കാക്കുന്നത്.