ജനകീയം ദുബൈ യാത്രകൾ; ആറ് മാസത്തിനിടെ പൊതുഗതാഗതം ഉപയോഗിച്ചത് 33 കോടിയിലേറെ യാത്രക്കാർ

ദുബൈ: 2023 ന്റെ ആദ്യ പകുതിയിൽ ദുബൈയിൽ പൊതു ഗതാഗതവും ടാക്‌സിയും ഉപയോഗിച്ച് യാത്ര നടത്തിയതിൽ റെക്കോർഡ്. ഏകദേശം 337 ദശലക്ഷം (33 കോടി 70 ലക്ഷം) യാത്രകളാണ് ആറ് മാസത്തിനിടെ നടന്നത്. 1.86 ദശലക്ഷം യാത്രകളാണ് ഒരു ദിവസം മാത്രം ദുബൈയിൽ നടക്കുന്നത്. കഴിഞ്ഞ വർഷം 304.6 ദശലക്ഷം യാത്രകളാണ് ഇക്കാലയളവിൽ നടന്നത്. പ്രതിദിനം 1.68 ആയിരുന്നു 2022 ലെ യാത്രകൾ. ദുബൈയിലെ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ) യാണ് ഇക്കാര്യം പുറത്തുവിട്ടത്.

ദുബൈ മെട്രോ, ദുബൈ ട്രാം, പബ്ലിക് ബസുകൾ, മറൈൻ ട്രാൻസ്പോർട്ട് മോഡുകൾ (അബ്രാസ്, ഫെറി, വാട്ടർ ടാക്സി, വാട്ടർ ബസ്), ഇ-ഹെയ്ൽ, റൈഡുകൾ, സ്‌മാർട്ട് കാർ വാടകയ്‌ക്കെടുക്കൽ, ബസ്-ഓൺ-ഡിമാൻഡ്, ടാക്സികൾ (ദുബായ് ടാക്‌സി, ഫ്രാഞ്ചൈസി കമ്പനി ടാക്സികൾ) പൊതുഗതാഗത മോഡുകൾ, ഷെയർഡ് മൊബിലിറ്റി, ടാക്‌സികൾ എന്നിവയിലായാണ് ഇത്രയധികം യാത്രകൾ ഈ വർഷത്തിന്റെ ആദ്യപകുതിയിൽ നടത്തിയത്.

“പൊതുഗതാഗതത്തിൽ ഏറ്റവും കൂടുതൽ റൈഡർഷിപ്പ് ദുബൈ മെട്രോയും ടാക്‌സികളും വഹിക്കുന്നു. 36.5% യാത്രകളും ദുബൈ മെട്രോയിലായിരുന്നു. ദുബൈ ടാക്സിക്ക് 29% ആയിരുന്നു ഇക്കാലയളവിൽ യാത്രക്കാർ. പൊതു ബസുകൾ 24.5% യാത്രകൾ നടത്തി. മാർച്ച് മാസത്തിലായിരുന്നു ഏറ്റവും കൂടുതൽ യാത്രകൾ നടന്നത്. 60 ദശലക്ഷം റൈഡറുകളാണ് ഇക്കാലയളവിൽ നടന്നത്. മറ്റ് മാസങ്ങളിൽ റൈഡർഷിപ്പ് 53 മുതൽ 58 ദശലക്ഷം വരെയാണ്"- റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയുടെ ബോർഡ് ഓഫ് എക്‌സിക്യൂട്ടീവ് ഡയറക്‌ടേഴ്‌സ് ചെയർമാൻ മാറ്റർ അൽ തായർ വ്യക്തമാക്കി.

2022 ലെ ഇതേ കാലയളവിനെ അപേക്ഷിച്ച് 2023 ന്റെ ആദ്യ പകുതിയിൽ റൈഡർഷിപ്പിൽ 11% വർധനയാണ് രേഖപ്പെടുത്തിയത്. ദുബൈയുടെ സാമ്പത്തിക വളർച്ചയുടെ ഒരു പ്രധാന വഴി കൂടിയാണ് പൊതുഗതാഗത്തിന് കിട്ടുന്ന ഈ അംഗീകാരം. താമസക്കാരെയും സന്ദർശകരെയും പൊതുഗതാഗതം ഉപയോഗിക്കാൻ പ്രോത്സാഹിപ്പിക്കുന്നതിനുള്ള ശ്രമങ്ങൾ ആർ.ടി.എ നടത്തിവരുന്നുണ്ട്.

"ദുബൈയുടെ സംയോജിത പൊതുഗതാഗത ശൃംഖല ഇപ്പോൾ എമിറേറ്റിന് ചുറ്റുമുള്ള ജനങ്ങളുടെ ചലനത്തിന്റെ നട്ടെല്ലായി മാറിയിരിക്കുന്നു. ജനങ്ങളുടെ സംസ്‌കാരത്തിലും പൊതുഗതാഗത മാർഗങ്ങൾ ഉപയോഗിക്കുന്നതിനുള്ള മനോഭാവത്തിലും മാറ്റം കൊണ്ടുവരുന്നതിൽ ദുബൈക്ക് സാധിച്ചു." - അൽ തായർ അഭിപ്രായപ്പെട്ടു.