മണിപ്പൂരില്‍ ഭരണസംവിധാനം തകര്‍ന്നു; രൂക്ഷവിമര്‍ശനവുമായി സുപ്രീംകോടതി

മണിപ്പൂര്‍: മണിപ്പൂരില്‍ ഭരണസംവിധാനവും ക്രമസമാധാനവും തകര്‍ന്നെന്ന രൂക്ഷവിമര്‍ശനവുമായി സുപ്രീംകോടതി. എഫ്.ഐ.ആര്‍ പോലും കൃത്യമായി ഇടാന്‍ കഴിയാത്തവിധം ഭരണസംവിധാനം തകര്‍ന്നുവെന്നും പൊലീസ് മനപൂര്‍വം നിഷ്‌ക്രിയമാകുന്നതാണോ എന്നും കോടതി വിമര്‍ശിച്ചു. സര്‍ക്കാര്‍ നല്‍കിയിരിക്കുന്ന റിപ്പോര്‍ട്ടുകള്‍ അവ്യക്തമാണെന്ന് പറഞ്ഞ സുപ്രീംകോടതി, മണിപ്പൂര്‍ ഡിജിപി തിങ്കളാഴ്ച നേരിട്ട് ഹാജരാകാനും ഉത്തരവിട്ടു. കേസന്വേഷണത്തിന് പ്രത്യേക സംഘം രൂപീകരിക്കുമെന്ന് സൂചന സുപ്രീംകോടതി നല്‍കി.

സ്ത്രീകള്‍ക്കെതിരായ അക്രമങ്ങളും എഫ്‌ഐആര്‍ ഇടുന്നതിലും ഗുരുതരമായ കാലതാമസം ഉണ്ടാകുന്നുവെന്ന് മണിപ്പുര്‍ സര്‍ക്കാരിന്റെ റിപ്പോര്‍ട്ട് പരിശോധിച്ച സുപ്രീംകോടതി കുറ്റപ്പെടുത്തി. ഗുരുതരമായ ആലസ്യമാണ്. പൊലീസിന് കഴിവില്ലാത്തതാണോ മനപൂര്‍വമാണോ എന്ന ചോദ്യമാണ് ചീഫ് ജസ്റ്റീസ് ഉയര്‍ത്തിയത്. 6532 എഫ് ഐ ആറില്‍ 11 എണ്ണം മാത്രമാണ് സ്ത്രീകള്‍ക്കെതിരായ അതിക്രമമെന്ന് മണിപ്പൂര്‍ സര്‍ക്കാരിന് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മെഹ്ത്ത കോടതിയില്‍ പറഞ്ഞു.

സ്ത്രീകളെ നഗ്‌നരാക്കി നടത്തിയതിലും കാര്‍വാഷിങ് സെന്ററില്‍ കുക്കി വനിതകള്‍ കൊല്ലപ്പെട്ടതിലുമുള്ള ചോദ്യങ്ങള്‍ക്ക് മണിപ്പുര്‍ സര്‍ക്കാരിന് കൃത്യമായി മറുപടിയില്ലായിരുന്നു. പൊലീസ് ജീപ്പില്‍ നിന്ന് സ്ത്രീകളെ ബലംപ്രയോഗിച്ച് കൊണ്ടുപോയി ആക്രമിച്ചതില്‍ ഏതെങ്കിലും പൊലീസുകാരെ ചോദ്യം ചെയ്‌തോ എന്നതിനും സര്‍ക്കാരിന് മൗനമായിരുന്നു. പൊലീസിന് അന്വേഷണം നടത്താന്‍ സാധ്യമല്ലാത്തതിനാലും സിബിഐക്ക് എല്ലാ കേസുകളും നോക്കാന്‍ കഴിയാത്തതിനാലും പ്രത്യേക അന്വേഷണം സംഘം രൂപീകരിക്കുമെന്നും കോടതി സൂചിപ്പിച്ചു. സമഗ്രപഠനത്തിന് മുന്‍ഹൈക്കോതി ജഡ്ജിമാര്‍ ഉള്‍പ്പെടുന്ന സമിതിയും വന്നേക്കും.