20 സീറ്റിലും ജയിക്കും, കേരളത്തിന്റെ പ്രതീക്ഷ കോണ്‍ഗ്രസ് കെ.സി വേണുഗോപാല്‍

ന്യൂഡല്‍ഹി: ലോക്‌സഭ തെരഞ്ഞെടുപ്പില്‍ കേരളത്തിലെ 20 സീറ്റിലും വിജയിക്കുമെന്നും കോണ്‍ഗ്രസാണ് കേരളത്തിന്റെ ഒരേയൊരു പ്രതീക്ഷയെന്നും എ.ഐ.സി.സി ജനറല്‍ സെക്രട്ടറി കെ.സി. വേണുഗോപാല്‍ എം.പി. 20 സീറ്റുകളിലും ജയിക്കുമെന്ന് കേരളാ നേതൃത്വത്തിന്റെ ഉറപ്പ് ലഭിച്ചിട്ടുണ്ട്. തെരഞ്ഞെടുപ്പുമായി ബന്ധപ്പെട്ട സമിതികള്‍ ഉടന്‍ സംഘടിപ്പിക്കും തെരഞ്ഞെടുപ്പ് മുന്നൊരുക്കം ചര്‍ച്ച ചെയ്യാനായി ചേര്‍ന്ന യോഗത്തിന് പിന്നാലെ അദ്ദേഹം പറഞ്ഞു.

ഇരട്ട അവഗണനയാണ് കേരളം അനുഭവിക്കുന്നത്. കേന്ദ്രം ഭരിക്കുന്ന ബി.ജെ.പി സര്‍ക്കാറിന്റെയും സംസ്ഥാനം ഭരിക്കുന്ന എല്‍.ഡി.എഫ് സര്‍ക്കാറിന്റെയും അവഗണന. രണ്ട് സര്‍ക്കാറുകള്‍ക്കുമെതിരെ ജനവികാരം ഉയരുകയാണ്. കേരളത്തില്‍ കോണ്‍ഗ്രസിന് വന്‍ വിജയം നേടാനുള്ള സാഹചര്യമുണ്ട്. കോണ്‍ഗ്രസ് അഭിപ്രായ വ്യത്യാസങ്ങള്‍ എല്ലാം മറന്ന് പ്രവര്‍ത്തിക്കുമെന്നും അദ്ദേഹം വ്യക്തമാക്കി.

കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയും രാഹുല്‍ ഗാന്ധിയും അടക്കമുള്ളവര്‍ യോഗത്തില്‍ പങ്കെടുത്തു. എ.കെ. ആന്റണി, രമേശ് ചെന്നിത്തല എന്നിവര്‍ ഓണ്‍ലൈനായും പങ്കെടുത്തു.