മഴയിലും കാറ്റിലും കാർ കേടുവന്നോ? പൊലിസ് സർട്ടിഫിക്കറ്റ് എങ്ങിനെ നേടാം?

ഷാർജ: യുഎഇയിൽ കഴിഞ്ഞ ഏതാനും ദിവസമായി കനത്ത വേനൽ മഴ തുടരുകയാണ്. പലയിടത്തും ശക്തമായ കാറ്റിൽ നാശനഷ്ടങ്ങൾ ഉണ്ടായി. കാറ്റിലും മഴയിലും കേടുപാടുകൾ സംഭവിച്ച വാഹനങ്ങൾക്കുള്ള സർട്ടിഫിക്കറ്റ് സ്മാർട്ട് ആപ്പ് വഴി ലഭിക്കുമെന്ന് ഷാർജ പൊലിസ് അറിയിച്ചു. ‘To Whom It May Concern Certificate’ ആണ് ലഭിക്കുക.

പ്രതികൂല കാലാവസ്ഥയിൽ വാഹനങ്ങൾക്ക് കേടുപാടുകൾ സംഭവിച്ചാൽ അത് റിപ്പോർട്ട് ചെയ്യാൻ ഈ സർട്ടിഫിക്കറ്റ് ആവശ്യമാണ്. ഔദ്യോഗിക സർട്ടിഫിക്കറ്റ് ആയതിനാൽ ഇൻഷുറൻസ് പോലുള്ള ആവശ്യങ്ങൾക്ക് ഈ സർട്ടിഫിക്കറ്റ് ആവശ്യമായി വരും.

ആപ്പ് എങ്ങനെ ഉപയോഗിക്കാം

സർട്ടിഫിക്കറ്റ് നേടുന്നതിന്, ഉപയോക്താക്കൾ ഷാർജ പൊലിസ് ആപ്പ് തുറന്ന് “Police Services” എന്ന ഐക്കണിൽ ക്ലിക്ക് ചെയ്ത് “To Whom It May Concern Certificate” എന്ന ഓപ്ഷൻ തിരഞ്ഞെടുക്കുക. വാഹന ഉടമസ്ഥാവകാശം, ഇൻഷുറൻസ് വിവരങ്ങൾ എന്നിവയ്‌ക്കൊപ്പം കേടുപാടുകൾ, സംഭവ സ്ഥലം, തീയതി, നാശനഷ്ടത്തിന്റെ ഫോട്ടോഗ്രാഫുകൾ എന്നിവ ആപ്പിലേക്ക് നൽകണം. പൂർത്തിയാക്കിക്കഴിഞ്ഞാൽ, ഇടപാട് നമ്പർ അടങ്ങിയ ഒരു ഇമെയിൽ അവർക്ക് ലഭിക്കും.

ഷാർജ പൊലിസ് ആപ്പ് എല്ലാ ആപ്പ് സ്റ്റോറുകളിലും ലഭ്യമാണ്. ഇത് എല്ലാ താമസക്കാരും ഡൗൺലോഡ് ചെയ്യണമെന്ന് ഷാർജ പൊലിസ് അറിയിച്ചു.