വേവലാതിയില്ലെന്ന് എംവി ഗോവിന്ദന്‍, തൃക്കാക്കരയിലേത് പോലെ പ്രവര്‍ത്തനം; വിഡി സതീശന്‍

കോഴിക്കോട്: പുതുപ്പള്ളിയില്‍ തെരഞ്ഞെടുപ്പ് പ്രഖ്യാപിച്ചിരിക്കെ പ്രതികരണവുമായി നേതാക്കള്‍. പുതുപ്പള്ളിയില്‍ 2021ല്‍ ഉമ്മന്‍ചാണ്ടി നേടിയതിനേക്കാള്‍ വലിയ ഭൂരിപക്ഷത്തില്‍ യു.ഡി.എഫ്. സ്ഥാനാര്‍ഥി വിജയിക്കുമെന്ന് പ്രതിപക്ഷനേതാവ് വി.ഡി. സതീശന്‍. അതേസമയം, അപ്രതീക്ഷിതമായി തിരഞ്ഞെടുപ്പ് പ്രഖ്യാപിച്ചു എന്നതുകൊണ്ടുള്ള യാതൊരു വേവലാതിയും അങ്കലാപ്പും സി.പി.എമ്മിനില്ലെന്ന് പാര്‍ട്ടി സെക്രട്ടറി എം.വി. ഗോവിന്ദന്‍ പറഞ്ഞു. ഉപതിരഞ്ഞെടുപ്പ് പ്രഖ്യാപിച്ച സാഹചര്യത്തില്‍ മാധ്യമങ്ങളോട് പ്രതികരിക്കുകയായിരുന്നു ഇരുവരും.

മണിക്കൂറുകള്‍ക്കുള്ളില്‍ കോണ്‍ഗ്രസ് സ്ഥാനാര്‍ഥിയെ പ്രഖ്യാപിക്കും. അത് എത്രമണിക്കൂറാണെന്നതിന്റെ പ്രശ്‌നം മാത്രേയുള്ളൂ. പ്രഖ്യാപനം ഇന്ന് ഉണ്ടാവുമെന്ന് പ്രതീക്ഷിച്ചിരുന്നില്ല, സെപ്തംബറില്‍ തിരഞ്ഞെടുപ്പ് ഉണ്ടാവുമെന്ന് സൂചന കിട്ടിയിരുന്നു. പുതുപ്പള്ളിയില്‍ തിരഞ്ഞെടുപ്പിന്റെ എല്ലാ ഒരുക്കങ്ങളും ആരംഭിച്ചിട്ടുണ്ട്. യു.ഡി.എഫ്. സ്ഥാനാര്‍ഥി ഉജ്ജ്വലമായ വിജയം നേടും. ഉമ്മന്‍ചാണ്ടി സര്‍ നേടിയതിനേക്കാള്‍ വലിയ ഭൂരിപക്ഷത്തില്‍ യു.ഡി.എഫ് സ്ഥാനാര്‍ഥി വിജയിക്കുമെന്നും വി.ഡി. സതീശന്‍ ആത്മവിശ്വാസം പ്രകടിപ്പിച്ചു.

'ഉമ്മന്‍ചാണ്ടിയുടെ ഓര്‍മകള്‍ ജനങ്ങളിലുണ്ട്. സര്‍ക്കാരിനെ പുതുപ്പള്ളിയിലെ ജനങ്ങളുടെ മനസ്സാക്ഷിയുടെ കോടതിയില്‍ വിചാരണ ചെയ്യുന്ന ദിവസങ്ങളാണ് ഇനിയുള്ളത്. കേരളത്തിലെ ജനങ്ങളുടെ മുന്നില്‍ സര്‍ക്കാരിനെ വിചാരണ ചെയ്യാനും തുറന്നുകാട്ടാനുമുള്ള അവസരമാക്കി തിരഞ്ഞെടുപ്പിനെ മാറ്റും. ആശയപരമായും രാഷ്ട്രീയമായും തിരഞ്ഞെടുപ്പിനെ നേരിടും.അദ്ദേഹം വ്യക്തമാക്കി.

ഏത് സമയത്ത് ഉപതിരഞ്ഞെടുപ്പ് നടത്താന്‍ തീരുമാനിച്ചാലും സി.പി.എമ്മും ഇടതുപക്ഷ ജനാധിപത്യമുന്നണിയും അതിന് തയ്യാറാണെന്നായിരുന്നു എം.വി. ഗോവിന്ദന്റെ പ്രതികരണം. താഴേത്തട്ട് വരെയുള്ള എല്ലാ സംഘടനാ മിഷനറികളും ഇതിനകം തന്നെ പ്രവര്‍ത്തനം ആരംഭിച്ചിട്ടുണ്ട്. തിരഞ്ഞെടുപ്പിനെ നല്ല രീതിയില്‍ തന്നെ നേരിടും. വളരെ പെട്ടെന്ന് തന്നെ സ്ഥാനാര്‍ഥിയെ പ്രഖ്യാപിക്കും. ഇടതുപക്ഷജനാധിപത്യമുന്നണിയുടെ വികസനപ്രക്രിയയെ തുരങ്കം വെക്കുന്ന പ്രതിപക്ഷ രാഷ്ട്രീയത്തെ തുറന്ന് കാണിക്കുന്ന ഫലപ്രദമായ തിരഞ്ഞെടുപ്പ് പ്രചാരണമായിരിക്കും നടത്തുക. പ്രതിപക്ഷത്തെ നല്ല രീതിയില്‍ വിചാരണ ചെയ്യുന്ന തിരഞ്ഞെടുപ്പായിരിക്കും പുതുപ്പള്ളിയിലേത്. സഹതാപമല്ല, രാഷ്ട്രീയമാണ് കാര്യം. പ്രതിപക്ഷവും അത് പറഞ്ഞല്ലോ? ജെയ്ക് സി. തോമസ് തന്നെ സ്ഥാനാര്‍ഥിയാവുമോ എന്ന ചോദ്യത്തിന് അക്കാര്യം പറയാന്‍ പറ്റില്ലെന്നായിരുന്നു എം.വി. ഗോവിന്ദന്റെ പ്രതികരണം.