ഗയാന: ട്വന്റി 20 പരമ്പരയിലെ മൂന്നാം മത്സരത്തില്‍ വെസ്റ്റിന്‍ഡീസിനെ ഏഴ് വിക്കറ്റിന് തകര്‍ത്ത് ഇന്ത്യ. വിന്‍ഡീസ് ഉയര്‍ത്തിയ 160 റണ്‍സ് വിജയലക്ഷ്യം 17.5 ഓവറില്‍ മൂന്ന് വിക്കറ്റ് നഷ്ടത്തില്‍ ഇന്ത്യ മറികടന്നു.സൂര്യകുമാര്‍ യാദവിന്റെയും തിലക് വര്‍മയുടെയും ഇന്നിങ്‌സുകളാണ് ഇന്ത്യന്‍ വിജയത്തില്‍ നിര്‍ണായകമായത്. അഞ്ച് മത്സരങ്ങളടങ്ങിയ പരമ്പരയില്‍ 21ന് വിന്‍ഡീസ് മുന്നിട്ടുനില്‍ക്കുകയാണ്.160 റണ്‍സ് വിജയലക്ഷ്യത്തിലേക്ക് ബാറ്റെടുത്ത ഇന്ത്യയ്ക്ക് യശസ്വി ജയ്‌സ്വാള്‍ (1), ശുഭ്മാന്‍ ഗില്‍ (6) ഓപ്പണിങ് സഖ്യത്തെ തുടക്കത്തിലേ നഷ്ടമായി. എന്നാല്‍ പിന്നീട് ക്രീസില്‍ ഒന്നിച്ച സൂര്യകുമാര്‍ തിലക് വര്‍മ സഖ്യം കളി ഇന്ത്യയ്ക്ക് അനുകൂലമാക്കി.

വിന്‍ഡീസ് ബൗളര്‍മാരെ കടന്നാക്രമിച്ച സൂര്യയായിരുന്നു കൂടുതല്‍ അപകടകാരി. 44 പന്തുകള്‍ നേരിട്ട താരം 10 ഫോറും നാല് സിക്‌സും പറത്തി 83 റണ്‍സെടുത്താണ് മടങ്ങിയത്. ഇന്ത്യന്‍ നിരയിലെ ടോപ് സ്‌കോററും സൂര്യ തന്നെ. തിലകിനൊപ്പം അതിവേഗം 87 റണ്‍സ് കൂട്ടിച്ചേര്‍ത്ത ശേഷമാണ് താരം മടങ്ങിയത്.പിന്നാലെ ക്യാപ്റ്റന്‍ ഹാര്‍ദിക് പാണ്ഡ്യയെ കൂട്ടുപിടിച്ച് തിലക് ഇന്ത്യയെ വിജയത്തിലെത്തിച്ചു. 37 പന്തുകള്‍ നേരിട്ട തിലക് നാല് ഫോറും ഒരു സിക്‌സുമടക്കം 49 റണ്‍സോടെ പുറത്താകാതെ നിന്നു. ഹാര്‍ദിക് 15 പന്തില്‍ നിന്ന് 20 റണ്‍സെടുത്തു.

വിന്‍ഡീസിനായി അല്‍സാരി ജോസഫ് രണ്ട് വിക്കറ്റ് വീഴ്ത്തി.നേരത്തേ ടോസ് നേടി ആദ്യം ബാറ്റുചെയ്ത വെസ്റ്റിന്‍ഡീസ് നിശ്ചിത ഓവറില്‍ അഞ്ചുവിക്കറ്റ് നഷ്ടത്തില്‍ 159 റണ്‍സെടുത്തിരുന്നു. ബ്രാന്‍ഡണ്‍ കിങ്ങിന്റെയും നായകന്‍ റോവ്മാന്‍ പവലിന്റെയും മികച്ച ബാറ്റിങ്ങാണ് വിന്‍ഡീസിന് മാന്യമായ സ്‌കോര്‍ സമ്മാനിച്ചത്.

Content Highlights:India won against wesi indies in 3rd t20