തിരുവനന്തപുരം: 2008-09 സാമ്പത്തിക വര്‍ഷത്തില്‍  തിരുവനന്തപുരം നഗരസഭയില്‍   കെ.എസ്.യു.ഡി.പി  നടപ്പിലാക്കിയ പദ്ധതികളില്‍  അഴിമതി നടന്നുവെന്ന പരാതിയില്‍  വിജിലന്‍സ്  അന്വേഷണത്തിന് ഉത്തരവ്.തിരുവനന്തപുരം വിജിലന്‍സ് കോടതി  ജഡ്ജ് ആന്റ് സെപഷ്യല്‍ എന്‍ക്വയറി കമ്മീഷണര്‍ ബദറുദ്ധീന്‍ ആണ് ഉത്തരവിട്ടത്.  തിരുവനന്തപുരം സ്വദേശി പായ്ച്ചിറ നവാസ് നല്‍കിയ ഹര്‍ജിയിലാണ് നടപടി.
2008-09 കാലഘട്ടത്തില്‍ നഗരസഭയ്ക്കു കീഴില്‍ കെ.എസ്.യു.ഡി.പി നിരവധി പ്രോജക്ടുകള്‍ നടപ്പിലാക്കിയിരുന്നു. ഈ പദ്ധതികളില്‍ വ്യാപകമായ അഴിമതികളും, ക്രമക്കേടുകളും നടന്നിട്ടുണ്ടെന്ന് കേരള ലോക്കല്‍ഫണ്ട് ഓഡിറ്റ് വകുപ്പ്  സര്‍ക്കാരിന് റിപ്പോര്‍ട്ടും നല്‍കിയിരുന്നു. എന്നാല്‍  ഓഡിറ്റ് റിപ്പോര്‍ട്ട് കൈമാറി ഒരു വര്‍ഷം കഴിഞ്ഞിട്ടും നടപടികളൊന്നുമെടുത്തില്ല.
തുടര്‍ന്നാണ്  ഓഡിറ്റ് റിപ്പോര്‍ട്ടും , അതിന്റെ  അടിസ്ഥാനത്തിലുളള തെളിവുകളുമായി പരാതിക്കാരന്‍ വിജിലന്‍സ് കോടതിയെ സമീപിച്ചത്. സംസ്ഥാന വിജിലന്‍സ് ഡയറക്ടര്‍ക്കാണ് അന്വേഷണ ചുമതല. കേസ് വീണ്ടും ഒക്‌ടോബര്‍21 ന് പരിഗണിക്കും.