പൊള്ളുന്ന ചൂടിന് ആശ്വാസമേകാൻ സഊദിയിൽ ഇന്ന് മഴയെത്തും, പൊടിക്കാറ്റിനും സാധ്യത

റിയാദ്: കടുത്ത വേനലിൽ പൊള്ളുന്ന സഊദി അറേബ്യക്ക് ആശ്വാസമായി ഇന്ന് മഴയെത്തും. ഇന്ന് മുതൽ തിങ്കളാഴ്ച വരെയാണ് മഴക്ക് സാധ്യതയെന്ന് സഊദി കാലാവസ്ഥ നിരീക്ഷണ കേന്ദ്രം അറിയിച്ചു. വിവിധ പ്രവിശ്യകളിൽ ഇടമഴ ലഭിക്കും. നിലവിൽ പൊള്ളുന്ന ചൂടാണ് രാജ്യത്തിന്റെ മിക്ക ഭാഗങ്ങളിലും അനുഭവപ്പെടുന്നത്.

വിശുദ്ധ നഗരമായ മക്ക, അസീര്‍, ജിസാന്‍, അല്‍ബാഹ എന്നിവിടങ്ങളില്‍ സാമന്യം ഭേദപ്പെട്ട തോതിൽ മഴ ലഭിക്കും. രാജ്യതലസ്ഥാനമായ റിയാദ്, മദീന, തബൂക്ക്, നജ്‌റാന്‍, കിഴക്കന്‍ പ്രവിശ്യ എന്നിവിടങ്ങളില്‍ നേരിയ തോതില്‍ മഴയുണ്ടാകുമെന്ന് പ്രതീക്ഷിക്കുന്നു.

മഴയോടൊപ്പം ശക്തമായ കാറ്റിനും സാധ്യതയുള്ളതായി കാലാവസ്ഥ നിരീക്ഷണ കേന്ദ്രം അറിയിക്കുന്നു. ചിലയിടങ്ങളിൽ പൊടിക്കാറ്റിനും സാധ്യതയുണ്ട്. രാവിലെയും രാത്രിയിലുമായി ആലിപ്പഴ വര്‍ഷത്തിനും സാധ്യത കാണുന്നുണ്ട്. ദൂരക്കാഴ്ച കുറയുന്നതിനാൽ വാഹനമോടിക്കുന്നവർ ജാഗ്രത പാലിക്കണം.