ദുബൈ: നഗരത്തിലെ പ്രധാന റോഡുകള്‍ ശുചീകരിക്കുന്നതിനായി അഞ്ച് ഓട്ടമാറ്റിക്ക് വാഹനങ്ങള്‍ കൂടി സ്വന്തമാക്കി ദുബൈ മുനിസിപ്പാലിറ്റി. മിനിറ്റുകള്‍ കൊണ്ട് റോഡും പരിസരവും ഏറ്റവും നന്നായി വൃത്തിയാക്കാന്‍ ശേഷിയുളള രാജ്യാന്തര നിലവാരം പാലിക്കുന്ന വാഹനങ്ങളാണ് ദുബൈ സ്വന്തമാക്കിയത്.ഒരു ദിവസം 2,250 കി.മീ. ദൂരം വൃത്തിയാക്കാന്‍ ശേഷിയുള്ളതാണ് ഓരോ വാഹനവും. അതിവേഗം ശുചീകരണ പ്രവൃത്തികള്‍ ചെയ്യുന്ന 4 പുതിയ വാഹനങ്ങള്‍ കൂടി ഈ വര്‍ഷം മുനിസിപ്പാലിറ്റി ശുചീകരണ വിഭാഗത്തിന്റെ ഭാഗമായെത്തും. പൊടിക്കാറ്റ് വ്യാപകമാകുന്ന സമയങ്ങളില്‍ റോഡില്‍ നിന്നു മണല്‍ നീക്കാന്‍ ഇവ പ്രയോജനപ്പെടും.

റോഡ് വൃത്തിയാക്കലുമായി ബന്ധപ്പെട്ട് പ്രവര്‍ത്തിക്കുന്ന തൊഴിലാളികളുടെ ജോലി ഭാരം കുറയ്ക്കുന്നതിനും, വൃത്തിയാക്കല്‍ പ്രക്രിയ കൂടുതല്‍ കാര്യക്ഷമമാക്കുന്നതിനും ഇത്തരം വാഹനങ്ങള്‍ സഹായിക്കുമെന്നാണ് അധികൃതരുടെ ഭാഷ്യം.പതിവ് വൃത്തിയാക്കലിനൊപ്പം മറ്റ് അടിയന്തര സാഹചര്യങ്ങളിലും പ്രസ്തുത വാഹനത്തിന്റെ സേവനം ഉപയോഗിക്കാം.റോഡ് അപകടങ്ങള്‍, കാറ്റില്‍ മണല്‍ത്തിട്ടകള്‍ രൂപപ്പെടുമ്പോള്‍, വഴിയില്‍ മൃഗങ്ങള്‍ ചാകുമ്പോള്‍, മറ്റ് മാലിന്യങ്ങള്‍ അടി!ഞ്ഞു കൂടുമ്പോഴെല്ലാം ഈ വാഹനങ്ങളും ശുചീകരണ തൊഴിലാളികളും സ്ഥലത്ത് എത്തി പ്രദേശം പൂര്‍വ സ്ഥിതിയിലാക്കും. ഈ വര്‍ഷം 670 തവണ ഇത്തരം സേവനങ്ങള്‍ക്കായി ശുചീകരണ തൊഴിലാളികളെ ഉപയോഗിച്ചു.

ദുബൈ മുനിസിപ്പാലിറ്റിയുടെ ശുചീകരണ വിഭാഗത്തിന് 750 വാഹനങ്ങളും ഉപകരണങ്ങളും ഉണ്ട്. ഇതില്‍ 35 വാഹനങ്ങള്‍ക്ക് ഹൈവേകള്‍ ശുചിയാക്കാന്‍ മാത്രമുള്ളതാണ്. കൃഷി അനുബന്ധ മാലിന്യങ്ങള്‍ കൈകാര്യം ചെയ്യാന്‍ അഗ്രിക്കള്‍ചറല്‍ ഷ്രഡര്‍ മെഷീനുകളും നഗരസഭയ്ക്ക് ഉണ്ട്. ഫാമുകള്‍, പൊതു പാര്‍ക്കുകള്‍ എന്നിവിടങ്ങളിലെ മാലിന്യങ്ങള്‍ സംസ്‌കരിച്ചു നീക്കം ചെയ്യുന്നതിനാണ് ഈ ഉപകരണങ്ങള്‍ ഉപയോഗിക്കുക.

Content Highlights:dubai municipal corporation buy five vehicles for cleaning