ദുബായ്: 77-ാം ഇന്ത്യന്‍ സ്വാതന്ത്ര്യ ദിനാഘോഷത്തോടനുബന്ധിച്ച് ദുബായ് ഇന്ത്യന്‍ കോണ്‍സുലേറ്റ് ആഭിമുഖ്യത്തില്‍ വ്യത്യസ്ത പരിപാടികള്‍ നടന്നു വരുന്നു. ഓഗസ്റ്റ് 12നും 13നും ബുര്‍ജുമാന്‍ സെന്ററില്‍ ഇന്ത്യയുടെ ഏറ്റവും സജീവവും വൈവിധ്യമുള്ളതുമായ സാംസ്‌കാരിക ജീവിതം എടുത്തു കാട്ടിയ ചിത്ര കംബള പ്രദര്‍ശനം ഒരുക്കി. വിസ്മയം വിതറുന്ന പരമ്പരാഗത നൃത്തങ്ങളും ഇന്ത്യയുടെ സമ്പന്നമായ സംഗീത പാരമ്പര്യത്തിലെ ഭാവഗാനങ്ങളും കോര്‍ത്തിണക്കിയ പരിപാടി ഹൃദയഹാരിയായിരുന്നു. ഓഗസ്റ്റ് 15ന് സ്വാതന്ത്ര്യ ദിനത്തില്‍ രാവിലെ അതിഥികള്‍ക്ക് ദേശീയ പതാകകളും ത്രി വര്‍ണ മധുര പലഹാരങ്ങളും വിതരണം ചെയ്യും. ഇവിടെ എത്തുന്ന അതിഥികള്‍ക്ക് ഫോട്ടോയെടുക്കാനുള്ള അവസരവും ഒരുക്കിയിട്ടുണ്ട്.
ആഘോഷ ഭാഗമായി കോണ്‍സുലേറ്റ് 20ന് ഞായറാഴ്ച 8 മണി മുതല്‍ ദുബായ് ഹെല്‍ത് അഥോറിറ്റി (ഡിഎച്ച്എ) ആസ്ഥാനത്ത് മെഗാ രക്തദാന ക്യാമ്പ് നടത്തുന്നുണ്ട്. രക്തദാനത്തിന് താല്‍പര്യമുള്ളവര്‍ക്ക് [email protected] ഇമെയിലില്‍ ബന്ധപ്പെടാവുന്നതാണ്.