പര്‍ദ്ദ ധരിച്ച് സ്ത്രീകളുടെ ശൗചാലയത്തില്‍ കയറി വീഡിയോ പകര്‍ത്തി; ഐ.ടി. ജീവനക്കാരന്‍ പിടിയില്‍

കൊച്ചി: പര്‍ദ്ദ ധരിച്ച് വനിതയെന്ന വ്യാജേന ഇടപ്പള്ളി ലുലു മാളിലെ ശൗചാലയത്തില്‍ കയറി ദൃശ്യങ്ങള്‍ പകര്‍ത്തിയ യുവാവ് അറസ്റ്റില്‍. സ്ത്രീകളുടെ ശൗചാലയത്തില്‍ മൊബൈല്‍ ഫോണ്‍ ഉപയോഗിച്ച് ദൃശ്യങ്ങളെടുത്ത കണ്ണൂര്‍ കരിവെള്ളൂര്‍ സ്വദേശി അഭിമന്യു എം.എ. (23) എന്നയാളെയാണ് കളമശ്ശേരി പോലീസ് അറസ്റ്റുചെയ്തത്. ബിടെക് ബിരുദധാരിയായ അഭിമന്യു ഇന്‍ഫോ പാര്‍ക്കിലെ പ്രമുഖ ഐ.ടി സ്ഥാപനത്തില്‍ ജീവനക്കാരനാണ്.

ചൊവ്വാഴ്ച രാത്രി ഒന്‍പത് മണിയോടെയാണ് സംഭവം. സാധാരണ വേഷത്തില്‍ മാളിലെത്തിയ അഭിമന്യു, ഒഴിഞ്ഞ സ്ഥലത്തുവെച്ച് കയ്യില്‍ കരുതിയിരുന്ന പര്‍ദ്ദ ധരിച്ച് സ്ത്രീകളുടെ ശുചിമുറിയില്‍ കയറി. തുടര്‍ന്ന് മൊബൈല്‍ ഫോണ്‍ ഒരു കാര്‍ഡ് ബോര്‍ഡ് പെട്ടിക്കുള്ളില്‍ ഒളിപ്പിച്ചുവെച്ചതിനുശേഷം അതില്‍ ചെറിയ ദ്വാരം ഉണ്ടാക്കി ശൗചാലയത്തിന്റെ വാതിലിനോട് ചേര്‍ത്ത് ഒട്ടിച്ചുവെക്കുകയായിരുന്നു.

വാതിലിനു മുന്നില്‍ നിന്നുള്ള അസ്വാഭാവിക പെരുമാറ്റം കണ്ട് സംശയം തോന്നിയ സ്ത്രീകള്‍ സെക്യൂരിറ്റി ജീവനക്കാരെ വിവരമറിയിക്കുകയായിരുന്നു. ഇവര്‍ അറിയിച്ചതിനെ തുടര്‍ന്ന് പൊലീസെത്തി ചോദ്യം ചെയ്തപ്പോഴാണ് പെണ്‍വേഷത്തില്‍ എത്തിയ പുരുഷനാണ് ഇതെന്നും ശുചിമുറി ദൃശ്യങ്ങള്‍ പകര്‍ത്തുകയായിരുന്നുവെന്നും തിരിച്ചറിഞ്ഞത്.

ചോദ്യം ചെയ്യലില്‍ പാലാരിവട്ടത്തുള്ള ഒരു തുണിക്കടയില്‍ നിന്നാണ് ഇയാള്‍ പര്‍ദ്ദ വാങ്ങിയതെന്ന് പോലീസ് കണ്ടെത്തി. ഇയാള്‍ വീഡിയോ പകര്‍ത്തുവാന്‍ ഉപയോഗിച്ച മൊബൈല്‍ ഫോണും ധരിച്ചിരുന്ന പര്‍ദ്ദയും മറ്റും പിടിച്ചെടുത്തിട്ടുണ്ട്. ഇയാള്‍ക്കെതിരെ ഇന്ത്യന്‍ ശിക്ഷാ നിയമത്തിലെ സെക്ഷന്‍ 354(ഇ) (വോയൂറിസം) , 419 (ആള്‍മാറാട്ടം), ഇന്‍ഫര്‍മേഷന്‍ ടെക്‌നോളജി ആക്ട് 66(ഇ) എന്നീ വകുപ്പുകള്‍ ചുമത്തി കേസ് രജിസ്റ്റര്‍ ചെയ്തു.