ചന്ദ്രയാന്‍ 3ന്റെ അവസാന ഭ്രമണപഥം താഴ്ത്തലും വിജയകരം; ലക്ഷ്യത്തിലേക്ക് ഇനി മൂന്ന് നാള്‍

ബംഗളൂരു: ഇന്ത്യയുടെ ചാന്ദ്ര പര്യവേഷണ പേടകം ചന്ദ്രയാന്‍3ന്റെ അഭിമാനക്കുതിപ്പ് ചന്ദ്രനരികെയെത്തിയതായി ഇന്ത്യന്‍ ബഹിരാകാശ ഗവേഷണ ഏജന്‍സി(ഇസ്രോ).രണ്ടാം ഡീ ബൂസ്റ്റിങ് വിജയകരമായി പൂര്‍ത്തിയാക്കി.

ഇന്നു പുലര്‍ച്ചെ നടന്ന രണ്ടാംഘട്ട ഡീബൂസ്റ്റിങോടെ ചന്ദ്രയാന്‍ 3ന്റെ ഭ്രമണപഥം ചന്ദ്രനോട് 25 കിലോമീറ്ററോളം അടുത്തു.

ആദ്യഘട്ട ഭ്രമണപഥം താഴ്ത്തല്‍ കഴിഞ്ഞ ദിവസം വിജയകരമായി പൂര്‍ത്തിയാക്കി ചന്ദ്രനോട് അടുത്ത ചന്ദ്രയാന്‍ ഇന്ന് പുലര്‍ച്ചെയോടെ ചന്ദ്രനുമായി കൂടിയ അകലം 100 കിലോമീറ്ററും കുറഞ്ഞ ദൂരം 25 കിലോമീറ്ററുമുള്ള വൃത്താകൃതിയിലുള്ള ഭ്രമണപഥത്തില്‍ എത്തി. ഇനിയുള്ള ദിവസങ്ങള്‍ നിര്‍ണായകമാണെന്ന് ഇസ്രോ വ്യക്തമാക്കി.

23ന് ചന്ദ്രന്റെ ദക്ഷിണധ്രുവത്തില്‍ സുരക്ഷിതമായി ഇറങ്ങാനുള്ള ഒരുക്കങ്ങളാണ് വരും ദിവസങ്ങളില്‍ നടക്കുക. ബംഗളൂരുവില്‍ ഇസ്രോയുടെ ട്രാക്കിങ് സെന്ററാണ് ചന്ദ്രയാന്റെ സഞ്ചാരക്രമം നിയന്ത്രിക്കുന്നത്.