ഒമാനില്‍ 3G സേവനം അവസാനിപ്പിക്കുന്നു

ഒമാനില്‍ 3G സേവനം അവസാനിപ്പിക്കാനൊരുങ്ങുന്നു. ഇതിന്റെ ഭാഗമായുള്ള പരിശോധന ആരംഭിച്ചു. ജനസാന്ദ്രത കുറഞ്ഞ പ്രദേശങ്ങളി ലാവും ആദ്യം 3G സേവനങ്ങള്‍ നിര്‍ത്തലാക്കുക. 2024ന്റെ മൂന്നാം പാദത്തോടെ ഒമാനിലെ എല്ലാ 3G സേവനങ്ങളും നിര്‍ത്തലാക്കുന്നതിന് തീരുമാനിച്ചിരുന്നു. ഇതിന്റെ മുന്നോടിയായാണ് നിര്‍ത്തലാക്കുമ്പോഴുള്ള ബുദ്ധിമുട്ടുകള്‍ തിരിച്ചറിയാനായി ഒമാന്‍ ടെലികമ്മ്യൂണിക്കേഷന്‍സ് റെഗുലേഷന്‍സ് അതോറിറ്റി പരീക്ഷണത്തിന് ഒരുങ്ങുന്നത്. ഇതിന്റെ ഭാഗമായി 4G നെറ്റ്‌വര്‍ക്ക് സേവനമെങ്കിലും ലഭ്യമല്ലാത്ത എല്ലാവിധ ഉപകരണങ്ങളുടെ അംഗീകാരവും ഇറക്കുമതിയും അവസാനിപ്പിക്കുകയും ചെയ്യും.

ഒമാനില്‍ ഇന്റര്‍നെറ്റിന്റെ വേഗത വര്‍ധിപ്പിക്കുന്നതിന്റെ ഭാഗമായി അധികൃതര്‍ 5G സ്റ്റേഷനുകളുടെ എണ്ണം 2,600ആയി വര്‍ധിപ്പിച്ചിട്ടുണ്ട്. 3G ഘട്ടംഘട്ടമായി നിര്‍ത്തലാക്കുന്നതിനുള്ള സമയക്രമം വിവിധ സ്‌പെക്ട്രം ഘടകങ്ങളെയും 2G/3G നെറ്റ്‌വര്‍ക്കുകളില്‍ ഉപയോഗിക്കുന്ന ഉപകരണങ്ങളുടെ എണ്ണത്തെയും ആശ്രയിച്ചാണ് തീരുമാനിക്കുക.