പാലക്കാട് സ്വകാര്യ ബസ് മറിഞ്ഞു രണ്ട് മരണം; നിരവധി പേര്‍ക്ക് പരുക്ക്

തിരുവാഴിയോട്: പാലക്കാട് തിരുവാഴിയോട് സ്വകാര്യ ബസ് നിയന്ത്രണം വിട്ട് മറിഞ്ഞുണ്ടായ അപകടത്തില്‍ രണ്ട് മരണം. ചെന്നൈയില്‍നിന്ന് കോഴിക്കോടേക്ക് പോയ ബസാണ് അപകടത്തില്‍പ്പെട്ടത്. കാര്‍ഷിക വികസന ബാങ്കിന് മുന്നില്‍ ബുധനാഴ്ച പുലര്‍ച്ചെയാണ് അപകടം. മലപ്പുറം സ്വദേശി സൈനബ (39) ആണ് മരിച്ചവരില്‍ ഒരാള്‍. രണ്ടാമത്തെയാളെ തിരിച്ചറിഞ്ഞിട്ടില്ല.

ജീവനക്കാര്‍ ഉള്‍പെടെ 38 പേരാണ് ബസില്‍ ഉണ്ടായിരുന്നത്. ഡ്രൈവര്‍ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം. ബസിന്റെ അടിയില്‍പ്പെട്ട രണ്ട് പേരാണ് മരിച്ചത്. ഇവര്‍ സംഭവസ്ഥലത്ത് വച്ച് തന്നെ മരിച്ചിരുന്നു. ഇവരുടെ മൃതദേഹം പാലക്കാട് ജില്ലാ ആശുപത്രിയിലേക്ക് മാറ്റിയിട്ടുണ്ട്.

അപകടത്തില്‍ പരിക്കേറ്റവരെ സമീപത്തെ വിവിധ ആശുപത്രികളിലായി പ്രവേശിപ്പിച്ചു. ഇവരില്‍ ആരുടെയും നില ഗുരുതരമല്ലെന്നാണ് നിലവില്‍ ലഭ്യമാകുന്ന വിവരം. നിയന്ത്രണം വിട്ട് മറിഞ്ഞതോടെ റോഡിന് കുറുകെ കിടക്കുന്ന നിലയിലായിരുന്നു ബസ്.