ഗോള്‍ഡന്‍ ജാവലിന്‍; ലോക അത്‌ലറ്റിക്‌സ് ചാമ്പ്യന്‍ഷിപ്പില്‍ ഇന്ത്യയുടെ ആദ്യ സ്വര്‍ണം നിരജ് ചോപ്ര വക

ബൂഡപെസ്റ്റ്: മറ്റൊരു ചരിത്രത്തിലേക്ക് ജാവലിന്‍ എറിഞ്ഞ് നീരജ് ചോപ്ര. ലോക അത്‌ലറ്റിക്‌സ് ചാമ്പ്യന്‍ഷിപ്പില്‍ സ്വര്‍ണം നേടുന്ന ആദ്യ ഇന്ത്യന്‍ താരമായി നീരജ്. പുരുഷ ജാവലിന്‍ ത്രോ മത്സരത്തില്‍ 88.17 മീറ്റര്‍ പ്രകടനത്തിലാണ് ഒന്നാമനായത്.

ടോക്യോ ഒളിമ്പിക്‌സ് ജേതാവായി ചരിത്രം കുറിച്ച നീരജ് തന്നെ ഇന്ത്യയുടെ യശസ്സ് ലോക ചാമ്പ്യന്‍ഷിപ്പിലുമുയര്‍ത്തി. കഴിഞ്ഞ വര്‍ഷം യു.എസിലെ യൂജീനില്‍ നടന്ന ലോക മീറ്റില്‍ വെള്ളി മെഡലാണ് നീരജ് സ്വന്തമാക്കിയത്.

പാകിസ്താന്റെ അര്‍ഷദ് നദീമിനാണ് (87.82) വെള്ളി. ഒളിമ്പിക് വെള്ളി മെഡല്‍ ജേതാവ് ചെക് റിപ്പബ്ലിക്കിന്റെ ജാകൂബ് വാദ് ലെജ് (86.67) വെങ്കലവും നേടി.

ഇക്കുറി മൂന്ന് ഇന്ത്യക്കാര്‍ ഫൈനലിലുണ്ടായിരുന്നു. കിഷോര്‍ ജെന (84.77) അഞ്ചാം സ്ഥാനത്തും ഡി.പി മനു (84.14) ആറാം സ്ഥാനത്തും എത്തി.