ശിക്ഷ തിങ്കളാഴ്ച വിധിക്കും
കൊച്ചി • കളമശ്ശേരി ബസ് കത്തിക്കല്‍ കേസില്‍ മൂന്ന് പ്രതികള്‍ കുറ്റക്കാരെന്ന് കൊച്ചി എന്‍.ഐ.എ കോടതി. കണ്ണൂര്‍ തയ്യില്‍ തടിയന്റവിട നസീര്‍, പെരുമ്പാവൂര്‍ സ്വദേശി സാബിര്‍ ബുഖാരി, എറണാകുളം പറവൂര്‍ സ്വദേശി താജുദ്ദീന്‍ എന്നിവരുടെ ശിക്ഷ തിങ്കളാഴ്ച വിധിക്കും.
കേസിൽ വിചാരണ പൂര്‍ത്തിയായിട്ടില്ലെങ്കിലും എന്‍.ഐ.എ ചുമത്തിയ കുറ്റങ്ങള്‍ സമ്മതിക്കുന്നതായി പ്രതികള്‍ കോടതിയെ അറിയിച്ച പശ്ചാത്തലത്തിലാണ് കുറ്റക്കാരാണെന്ന് കണ്ടെത്തിയത്. നിലവിലെ റിമാന്‍ഡ് കാലാവധി ശിക്ഷാ കാലവധിയായി കണക്കാക്കുമെന്നതിനിലാണ് പ്രതികളുടെ ഈ നീക്കം.
സൂഫിയ മഅ്ദനി ഉള്‍പ്പടെ കേസില്‍ 13 പ്രതികളുണ്ട്. ഇതില്‍ അഞ്ചാം പ്രതി കെ.എ അനുപ് കുറ്റസമ്മതം നടത്തിയതിനെ തുടര്‍ന്ന് ആറ് വര്‍ഷം കഠിനതടവും 1.6 ലക്ഷം രൂപ പിഴയും കഴിഞ്ഞ വര്‍ഷം ശിക്ഷ വിധിച്ചിരുന്നു. ഈ കേസിലുൾപ്പെടുകയും പിന്നീട് കാശ്മിരില്‍ സൈന്യവുമായുള്ള ഏറ്റുമുട്ടലില്‍ വെടിയേറ്റുമരിക്കുകയും ചെയ്ത പരപ്പനങ്ങാടി ചെട്ടിപ്പടി സ്വദേശി അബ്ദുല്‍ റഹീമിനെ പ്രതിപ്പട്ടികയില്‍നിന്ന് ഒഴിവാക്കിയിട്ടുണ്ട്.
2005 സെപ്റ്റംബര്‍ ഒൻപതിനാണ് കേസിനാസ്പദമായ സംഭവം.