തിരുവനന്തപുരം • സജി ചെറിയാൻ രാജിവച്ചതിനു പിന്നാലെ സ്റ്റാഫ് അംഗങ്ങളുടെ കാലാവധി നീട്ടി. ജൂലൈ ആറിനായിരുന്നു മന്ത്രിയുടെ രാജിയെങ്കിൽ 20 വരെ പഴ്‌സനൽ സ്റ്റാഫുകൾക്ക് ജോലിയിൽനിന്ന് പിരിഞ്ഞുപോകാനുള്ള സാവകാശം നൽകിയാണ് സർക്കാർ ഉത്തരവിറക്കിയത്. അതേസമയം, 21 മുതൽ ഇവരെ മറ്റു മന്ത്രിമാരുടെ സ്റ്റാഫിലേക്ക് നിയമിച്ചും സർക്കാർ ഉത്തരവിറക്കി. മന്ത്രിമാരുടെ പഴ്‌സനൽ സ്റ്റാഫുകൾക്ക് ചെറിയ ഒരു ഇടവേള പോലും പെൻഷൻ ആനുകൂല്യങ്ങൾക്ക് തിരിച്ചടിയാകും. ഇതിനാലാണ് ആദ്യം പഴ്‌സനൽ സ്റ്റാഫിന്റെ കാലാവധി നീട്ടുകയും പിന്നാലെ മറ്റു മന്ത്രിമാരുടെ സ്റ്റാഫിലേക്ക് നിയമനം നൽകുകയും ചെയ്തത്.