ദുബൈ: കേരളത്തില്‍ മഴക്കെടുതികളുടെ ദുരിതം പേറുമ്പോള്‍ പ്രവാസലോകത്തും മലയാളികള്‍ പ്രളയദുരിതത്തില്‍. യു.എ.ഇയുടെ കിഴക്കന്‍ പ്രവിശ്യകളില്‍ ഈയിടെ ഉണ്ടായ പേമാരിയിലും വെള്ളപ്പൊക്കത്തിലും ജീവനോപാധികളും അവശ്യ രേഖകളും നഷ്ടപ്പെട്ട നിരവധി മലയാളികള്‍ ദുരിതത്തില്‍. പ്രളയത്തില്‍ പാസ്‌പോര്‍ട്ട് അടക്കമുള്ള വിലപിടിപ്പുള്ള രേഖകള്‍ നഷ്ടമായവരും ഏറെയാണ്. അതിനിടെ പ്രളയ ബാധിത പ്രദേശങ്ങളില്‍ ജനജീവിതം സാധാരണ നിലയിലേക്ക് മടങ്ങിവരികയാണിപ്പോള്‍.
കൊവിഡ് കാരണം പ്രതിസന്ധിയിലായിരുന്ന രണ്ടു വര്‍ഷങ്ങള്‍ക്ക് ശേഷം ജീവിതവും കച്ചവടവുമെല്ലാം ഒന്നു പച്ചപിടിച്ചു വരുന്നതിനിടെയാണ് വേനല്‍കാലത്ത് ഇത്തവണ അപ്രതീക്ഷിത മഴയെത്തിയത്. ഫുജൈറ ഉള്‍പ്പെടെയുള്ള സ്ഥലങ്ങളില്‍ വേനല്‍ മഴ കനത്ത നാശമാണ് വിതച്ചത്. വിലപിടിപ്പുള്ള സാധനങ്ങള്‍ പോലും ഒന്ന് മാറ്റിവെക്കാനുള്ള സമയം ലഭിക്കാതെയാണ് പലരും ജീവനും കൊണ്ട് രക്ഷപ്പെട്ടത്. ആദ്യം ചെറിയ രീതിയില്‍ കയറിയ വെള്ളം പിന്നീട് വളരെ വേഗം താമസ സ്ഥലങ്ങളിലും വ്യാപാര സ്ഥാപനങ്ങളിലുമെല്ലാം വെള്ളം നിറയുകയായിരുന്നു.
പെട്ടെന്ന് വെള്ളം കയറിയതിനാല്‍ കച്ചവട സ്ഥാപനങ്ങളില്‍ നിന്ന് വിലപ്പെട്ട സാധനങ്ങള്‍ പോലും എടുത്തുമാറ്റാന്‍ പലര്‍ക്കും സാധിച്ചില്ല. പലരും ഓര്‍ഡറുകള്‍ക്ക് അനുസരിച്ച് വലിയ തോതില്‍ സാധനങ്ങള്‍ കച്ചവട സ്ഥാപനങ്ങളില്‍ സ്റ്റോക്ക് ചെയ്തിരുന്നു. ഇവയെല്ലാം വെള്ളം കയറി നശിച്ചു. പലര്‍ക്കും വീടും വാഹനവുമെല്ലാം നഷ്ടമായി. വാഹനം ഉപയോഗിക്കാനാവാത്ത വിധത്തില്‍ നശിച്ചുപോയി.പാസ്‌പോര്‍ട്ടും, വിദ്യാഭ്യാസ രേഖകളും അടക്കം മഴവെള്ളപാച്ചിലില്‍ ഒഴുകിപോയവര്‍ ആശങ്കയിലാണ്. ഷാര്‍ജ കല്‍ബയിലും ഫുജൈറയിലും വെള്ളംകയറിയ മേഖലകളില്‍ താമസിച്ചിരുന്ന പലരും ഇപ്പോഴും ഹോട്ടലുകളിലും ബന്ധുക്കളുടെയും സുഹൃത്തുക്കളുടെയും വീടുകളിലുമാണ് കഴിയുന്നത്. യു.എ.ഇ കെ.എം.സി ഉള്‍പ്പെടെ സംഘടനകള്‍ ഇന്ത്യന്‍ കോണ്‍സുലേറ്റിനെ പ്രവാസ ഇന്ത്യക്കാരുടെ ദുരിതം അറിയിച്ചിട്ടുണ്ട്. അധികൃതരില്‍ നിന്നും അനുകൂല സമീപനം പ്രതീക്ഷിക്കയാണ് മലയാളികള്‍ ഉള്‍പ്പെടെ പ്രവാസികള്‍.