ഗസ്സ സിറ്റി: ഫലസ്തീന്‍ നഗരമായ ഗസ്സയില്‍ ഇസ്‌റാഈല്‍ തുടരുന്ന വ്യോമാക്രമണത്തില്‍ മരിച്ചവരുടെ എണ്ണം 24 ആയി. 215 പേര്‍ക്ക് പരിക്കേറ്റു. മരിച്ചവരില്‍ ആറു കുട്ടികളും 75വയസ്സുള്ള സ്ത്രീയും ഉള്‍പ്പെടും.

ശനിയാഴ്ച നടത്തിയ ആക്രമണത്തിലാണ് 75 വയസ്സുള്ള സ്ത്രീ കൊല്ലപ്പെട്ടത്. കാറിലുണ്ടായിരുന്ന ആറുപേര്‍ക്ക് പരുക്കേല്‍ക്കുകയും ചെയ്തു. ഗസ്സയിലെ ജബലിയയില്‍ നടത്തിയ വ്യോമാക്രമണത്തില്‍ മൂന്നു കുട്ടികളുള്‍പ്പെടെ അഞ്ചു പേര്‍ മരിച്ചിരുന്നു.

ശനിയാഴ്ച ഉച്ചയോടെ ഗസ്സ സിറ്റിയിലെ താമസമേഖലയില്‍ ഇസ്‌റാഈല്‍ ആക്രമണത്തില്‍ രണ്ട് നിലകളുള്ള വീട് തകര്‍ന്നു. സമീപത്തെ വീടുകള്‍ക്കും നാശമുണ്ടായി. സ്ത്രീകളും കുട്ടികളും പ്രദേശത്ത് നിന്ന് ഓടിയതിനാല്‍ ആളപായമുണ്ടായില്ല.

വെള്ളിയാഴ്ച നടത്തിയ ആക്രമണത്തില്‍ അല്‍ ഖുദ്‌സ് ബ്രിഗേഡിന്റെ കമാന്‍ഡര്‍ തയ്‌സീര്‍ അല്‍ ജബ്രി അടക്കം 10 പേര്‍ കൊല്ലപ്പെട്ടിരുന്നു. 400ലേറെ റോക്കറ്റുകളാണ് ഗസ്സക്കു നേരെ അയച്ചത്.