അമ്മ ലാസ്റ്റ് ഗ്രേഡ് സർവൻ്റ്സ് പട്ടികയിൽ 92-ാം റാങ്കുകാരി. മകൻ 38-ാം റാങ്കോടെ എൽ.ഡി ക്ലർക്ക് ലിസ്റ്റിലും
എൻ.സി ഷെരീഫ്
മഞ്ചേരി (മലപ്പുറം) • അരീക്കോട് സൗത്ത് പുത്തലം കറുത്തചോല ഓട്ടുപാറ വീട്ടിലെത്തിയ ഇൗ നേട്ടത്തിന് പത്തരമാറ്റല്ല, അതിലും തിളക്കമുണ്ട്. ഒരുമിച്ച് പി.എസ്.സി പരീക്ഷയ്ക്ക് പഠിച്ച അമ്മയും മകനും സർക്കാർ സർവിസിലേക്കുള്ള പടികയറുന്നതും ഒന്നിച്ചാണെന്ന അത്യപൂർവതയ്ക്കാണ് ഇൗ ഭവനം സാക്ഷ്യം വഹിക്കുന്നത്.

അമ്മ ബിന്ദു മലപ്പുറം ജില്ലാ ലാസ്റ്റ് ഗ്രേഡ് സർവൻ്റ്സ് പട്ടികയിൽ 92-ാം റാങ്കുകാരിയാണ്. ഒരു പടികൂടി മുന്നേറി മകൻ വിവേക് നേടിയത് എൽ.ഡി ക്ലർക്ക് പട്ടികയിൽ 38-ാം റാങ്കും. ഒരമ്മയുടെയും മകൻ്റെയും നിശ്ചയദാർഢ്യത്തിൻ്റെയും നിതാന്ത പരിശ്രമത്തിൻ്റെയും കഥകൂടിയാണിത്. റാങ്ക് ലിസ്റ്റിലെ നേട്ടത്തിനപ്പുറം ഇരുവരും പരസ്പരം സഹകരിച്ചും ഒപ്പം മത്സരിച്ചും നേടിയ വിജയവും. അത് കൊണ്ട് തന്നെയാണ് ഇരുവർക്കും സ്വന്തം നേട്ടത്തേക്കാൾ പരസ്പരം മാധുര്യം തോന്നുന്നതും. സ്വകാര്യ സ്ഥാപനത്തിൽ ഇരുവരും ഒരുമിച്ചാണ് പരിശീലന ക്ലാസിലെത്തുക. തിരിച്ച് വീട്ടിലെത്തിയാൽ പിന്നെ സംശയദൂരീകരണവും പരസ്പരം ചോദ്യമെറിഞ്ഞുള്ള പരിശീലനക്കളരിയും തുടരും. അമ്മയും മകനും വിദ്യാർഥിയും അധ്യാപകനുമായി വീട്ടിൽ പരീക്ഷയും സമ്മാനദാനവും. രണ്ട് പേർ മാത്രമാകുന്ന അനുമോദന ചടങ്ങും. ജയപരാജയങ്ങൾ അറിഞ്ഞുള്ള കഠിനപരിശ്രമം. ഈ സ്നേഹവും ചേർത്തുനിർത്തലും തന്നെയാണ് ഇരുവരുടേയും നേട്ടങ്ങൾക്ക് തിളക്കമേറ്റുന്നതും. 41 കാരിയായ ബിന്ദുവിന് അവസാനത്തെ അവസരത്തിലാണ് ആദ്യ 100 റാങ്കിൽ ൽ ഇടം നേടാനായത്. 2014 മുതൽ ശ്രമം നടത്തുന്നുണ്ട്. 2017 ൽ 684-ാം റാങ്ക് നേടി. ഇതിൽ 683 പേരും നിയമനം നേടിയപ്പോഴും ബിന്ദുവിന് ഒട്ടും നിരാശ തോന്നിയില്ല. കൂടുതൽ മുന്നേറാനുള്ള പ്രചോദനമായിരുന്നു അത്.

നിശ്ചയദാർഢ്യത്തോടെ പഠനവഴിയിൽ ഉറച്ചുനിൽക്കാൻ വിവേക് സഹായിയായി മാറി. തിരിച്ച് മകന് അധ്യാപികയായി അമ്മയും. 2019ലാണ് വിവേക് പി.എസ്.സി പരീക്ഷ എഴുതിയത്. നാലാമത്തെ ശ്രമത്തിലാണ് 38-ാം റാങ്ക് നേടിയത്. നേട്ടത്തെ കുറിച്ച് ചോദിച്ചാൽ അമ്മയ്ക്ക് റാങ്ക് നേടാനായല്ലോയെന്ന് വിവേകും മകൻ്റെ വിജയത്തിൽ സന്തോഷിക്കുന്നെന്ന് ബിന്ദുവും പറയും. 24 കാരനായ വിവേക് ബിരുദധാരിയാണ്.

അരീക്കോട് മാതക്കോട് അങ്കണവാടിയിൽ ടീച്ചറായ ബിന്ദുവിന് 2019ൽ മികച്ച അങ്കണവാടി ടീച്ചർക്കുള്ള പുരസ്കാരം ലഭിച്ചിരുന്നു. 'നന്നായി പഠിച്ചെങ്കിലും ഇത്രയൊന്നും പ്രതീക്ഷിച്ചതല്ല, ദൈവം നൽകിയ അനുഗ്രഹമാണ്', അമ്മയ്ക്കും മകനും ആനന്ദക്കണ്ണീർ. ബിന്ദുവിൻ്റെ ഭർത്താവ് ചന്ദ്രൻ കെ.എസ്.ആർ.ടി.സി എടപ്പാൾ ഡിപ്പോയിൽ മെക്കാനിക്കാണ്. വീട്ടിലെ ഇളയവൾ ഹൃദ്യ പെരിന്തൽമണ്ണ പോളിടെക്നിക് കോളജ് വിദ്യാർഥിയാണ്.