ബിഹാര്‍: ബി.ജെ.പിക്കെതിരെ ആഞ്ഞടിച്ച് ജെഡിയു നേതാവ് നിതീഷ് കുമാര്‍. 2024ല്‍ ബി.ജെ.പി ജയിക്കില്ല. 2024ന് ശേഷം മോദി പ്രധാനമന്ത്രിയായി തുടരില്ലെന്നും നിതീഷ് കുമാര്‍ പറഞ്ഞു.

ബി.ജെ.പി തന്നെ ഒതുക്കാന്‍ നോക്കി. ബി.ജെ.പി സഖ്യം കൊണ്ട് ജെഡിയുവിന്റെ അംഗസംഖ്യ കുറഞ്ഞു. 2020ല്‍ മുഖ്യമന്ത്രിയാവാന്‍ ആഗ്രഹിച്ചിരുന്നില്ല. ബി.ജെ.പിയുടെ നിര്‍ബന്ധത്തിന് വഴങ്ങിയാണ് അന്ന് മുഖ്യമന്ത്രിയായത്. തനിക്ക് പ്രധാനമന്ത്രിയാവാന്‍ മോഹമില്ലെന്നും നിതീഷ് കൂട്ടിച്ചേര്‍ത്തു.

ബിഹാറില്‍ മഹാഗഡ്ബന്ധന്‍ സര്‍ക്കാര്‍ അധികാരമേറ്റു. നിതീഷ്‌കുമാര്‍ മുഖ്യമന്ത്രിയായി സത്യപ്രതിഞ്ജ ചെയ്തു. ആര്‍.ജെ.ഡി നേതാവ് തേജസ്വി യാദവ് ഉപമുഖ്യമന്ത്രിയായും അധികാരമേറ്റു.

നിതീഷ്‌തേജസ്വി കൂട്ടുക്കെട്ട് ബിഹാറില്‍ ഇത് രണ്ടാം തവണയാണ് അധികാരത്തില്‍ വരുന്നത്. 2015ലായിരുന്നു നിതീഷിന്റേയും തേജസ്വിയുടേയും നേതൃത്വത്തിലുള്ള ആദ്യ മഹാസഖ്യ സര്‍ക്കാര്‍ അധികാരത്തിലേറിയത്.