കോട്ടയം: കേരളാ കോണ്‍ഗ്രസ് എം ഇടതു മുന്നണിയില്‍ എത്തുമെന്ന് ഭയപ്പെട്ട് സി.പി.ഐ വിളറിപിടിക്കേണ്ടതില്ലെന്ന് കേരളാ കോണ്‍ഗ്രസ് ജനറല്‍സെക്രട്ടറി ജോയി എബ്രഹാം. നിരവധി തെരഞ്ഞെടുപ്പുകളില്‍ ഒറ്റയ്ക്ക് നിന്ന് പൊരുതി ശക്തി തെളിയിച്ച കേരളാ കോണ്‍ഗ്രസ് (എം) മുന്നണി പ്രവേശ അപേക്ഷയുമായി ആരുടെയെങ്കിലും പിന്നാലെ നടക്കുമെന്ന തെറ്റിദ്ധാരണ സി.പി.ഐയ്ക്ക് വേണ്ട.
സ്വന്തംകാലില്‍ നില്‍ക്കാന്‍ കഴിയുമെന്ന ആത്മവിശ്വാസം ഉള്ളതുകൊണ്ടാണ് കേരളാ കോണ്‍ഗ്രസ് യു.ഡി.എഫ് വിട്ടത്. തങ്ങള്‍ എല്‍.ഡി.എഫില്‍ എത്തിയാല്‍ സി.പി.ഐയുടെ സ്ഥാനത്തിന് കോട്ടംതട്ടുമെന്ന ഭയം വേണ്ട. കേരളാ കോണ്‍ഗ്രസ് എം ഇടതുമുന്നണിയില്‍ ചേരാന്‍ ഉദ്ദേശിക്കുന്നില്ല. സി.പി.ഐക്ക് പഴയത് പോലെ സുഖമായി കഴിയാം.
പാര്‍ലമെന്റ് സീറ്റ് വിറ്റ് വരുമാനമുണ്ടാക്കുന്ന പാരമ്പര്യം കേരളാ കോണ്‍ഗ്രസിനില്ല. അങ്ങനെയിരിക്കെ സംശുദ്ധരാഷ്ട്രീയത്തിന്റെ സാരോപദേശം കേരളാകോണ്‍ഗ്രസിനോട് വേണ്ടെന്നും അദ്ദേഹം പറഞ്ഞു.