കൊല്‍ക്കത്ത: തൃണമൂല്‍ കോണ്‍ഗ്രസിന് വീണ്ടും തിരിച്ചടി. പ്രമുഖ നേതാവ് അനുബ്രത മൊണ്ഡാലിനെ സിബിഐ അറസ്റ്റ് ചെയ്തു. പശുക്കടത്ത് കേസില്‍ നിരവധി തവണ അനുബ്രതയെ ചോദ്യം ചെയ്യാനായി സിബിഐ വിളിപ്പിച്ചിരുന്നു എന്നാല്‍ ഹാജരാവുന്നതില്‍ വീഴ്ച്ച വന്നതാണ് അറസ്റ്റ് ചെയ്യാന്‍ കാരണം.

സിബിഐ സംഘം സിആര്‍പിഎഫ് ഉദ്യോഗസ്ഥര്‍ക്കൊപ്പം എത്തിയാണ് മൊണ്ഡലിനെ അറസ്റ്റ് ചെയ്തത്. ചോദ്യം ചെയ്യലിന് ഹാജരാകാന്‍ രണ്ടാഴ്ച സമയം വേണമെന്ന് മൊണ്ഡലിന്റെ അഭിഭാഷകന്‍ ആവശ്യപ്പെട്ടിരുന്നു. ഇത് തള്ളിയാണ് പെട്ടെന്നുള്ള അറസ്റ്റ്.

പശുക്കടത്തുമായി ബന്ധപ്പെട്ട് അനുബ്രത മൊണ്ഡലിനെതിരെ 11 കേസുകളാണ് സിബിഐ രജിസ്റ്റര്‍ ചെയ്തത്. മൊണ്ഡലിന്റെ അംഗരക്ഷകനായ സൈഗല്‍ ഹുസൈനെ നേരത്തെ അറസ്റ്റ് ചെയ്തിരുന്നു.