ദുബൈ: ഫുജൈറയില്‍ എണ്ണ ടാങ്കര്‍ മറിഞ്ഞ് തീപിടിച്ച് ഏഴു പേര്‍ക്ക് പരിക്ക്. ഫുജൈറ അല്‍ ബിത്നയിലാണ് അപകടമുണ്ടായത്.ഓയില്‍ ടാങ്കര്‍ റോഡില്‍ നിന്ന് മലയിടുക്കിലേക്ക് മറിഞ്ഞ് തീപിടിക്കുകയായിരുന്നു. ഹെലികോപ്ടര്‍ ഉള്‍പ്പെടെ റോഡില്‍ പറന്നിറങ്ങിയാണ് രക്ഷാപ്രവര്‍ത്തനം നടത്തിയത്. പരിക്കേറ്റവരെ ആശുപത്രിയിലേക്ക് മാറ്റി. കഴിഞ്ഞ ദിവസം ഉച്ചയോടെ ഉണ്ടായ അപകടത്തില്‍ പരിക്കേറ്റവരെ നാഷണല്‍ സെര്‍ച്ച് ആന്‍ഡ് റെസ്‌ക്യൂ സെന്ററിന്റെ ഹെലികോപ്ടര്‍ എത്തിയാണ് ഫുജൈറ ആശുപത്രിയിലേക്ക് മാറ്റിയത്. ടാങ്കറിലുണ്ടായിരുന്ന ഏഷ്യന്‍ പ്രവാസിയെ നേരത്തേ പുറത്തെടുത്ത് ആശുപത്രിയിലെത്തിച്ചതായി അധികൃതര്‍ പറഞ്ഞു. സംഭവത്തെ തുടര്‍ന്ന് ഏറെ നേരം അല്‍ബിത്നയിലെ ശൈഖ് മക്തൂം സ്ട്രീറ്റ് പൊലിസ് അടച്ചിട്ടു. അല്‍ ബിത്നക്കും അല്‍ ഫര്‍ഫാര്‍ റൗണ്ട് എബൗട്ടിനുമിടയില്‍ രണ്ടുദിശയിലേക്കും ഏറേനേരം ഗതാഗതം തടസപ്പെട്ടു.