തിരുവനന്തപുരം • കണ്ണൂർ സർവകലാശാലയിൽ മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ രാഗേഷിന്റെ ഭാര്യ പ്രിയ വർഗീസിന്റെ നിയമനം റദ്ദാക്കിയതിനു പിന്നാലെ വൈസ് ചാൻസലർക്കെതിരേ ഇന്നലെയും വിമർശനമുന്നയിച്ച് ഗവർണർ. സി.പി.എമ്മിന്റെ രാഷ്ട്രീയതാൽപര്യം മുൻനിർത്തിയാണ് വി.സി പ്രവർത്തിക്കുന്നതെന്നാണ് ഗവർണർ ആരിഫ് മുഹമ്മദ് ഖാൻ പ്രതികരിച്ചത്. പ്രിയ വർഗീസിന്റെ നിയമനത്തിൽ വി.സിയുടെ ഭാഗത്തുനിന്ന് ഗുരുതര വീഴ്ച ഉണ്ടായെന്നാണ് രാജ്ഭവന് നിയമോപദേശം ലഭിച്ചത്. നിയമന വിവാദത്തിൽ ഒരിഞ്ച് വിട്ടുകൊടുക്കാനില്ലെന്ന നിലപാടിൽ തന്നെയാണ് ഗവർണർ.

കഴിഞ്ഞ മൂന്നു വർഷക്കാലയളവിൽ സർവകലാശാലകളിൽ നടന്ന ബന്ധു നിയമനങ്ങൾക്കെതിരേ തുറന്ന പോരിനിറങ്ങാനും ഗവർണർ ഒരുങ്ങുകയാണ്.
വിരമിച്ച ഹൈക്കോടതി ജഡ്ജി, റിട്ട. ചീഫ് സെക്രട്ടറി, രാജ്യത്തെയും സംസ്ഥാനത്തെയും ഉന്നത വിദ്യാഭ്യാസ മേഖലയിലെ വിദഗ്ധർ എന്നിവരടങ്ങുന്ന സമിതിയാകും അന്വേഷണം നടത്തുക. നിയമനങ്ങളുടെ മുഴുവൻ രേഖകളും വി.സിമാരോട് ആവശ്യപ്പെടും. വി.സിമാരടക്കം ബന്ധപ്പെട്ട എല്ലാവരെയും ഹിയറിങ് നടത്തുന്ന കാര്യവും ആലോചനയിലുണ്ട്.
സർവകലാശാലയുടെ മേലധികാരി എന്ന നിലയിൽ ചാൻസലർക്ക് ഏതു നിയമനങ്ങളും പരിശോധിക്കാം. ക്രമക്കേട് കണ്ടെത്തിയാൽ നടപടി എടുക്കാനും അധികാരമുണ്ട്. അതുകൊണ്ടു തന്നെ ബന്ധു നിയമനങ്ങളിൽ ശക്തമായ നടപടികളായിരിക്കും ഗവർണർ സ്വീകരിക്കുക.