അഴിമതി ആരോപണത്തിൽ സി.ബി.ഐ പ്രാഥമികാന്വേഷണം
ന്യൂഡൽഹി • മോദിക്ക് എതിരാളിയായി ദേശീയരാഷ്ട്രീയത്തിൽ ഉയർന്നുവരാനുള്ള ആംആദ്മി പാർട്ടി നേതാവ് അരവിന്ദ് കെജ്‌രിവാളിന്റെ നീക്കത്തെ മുളയിലേ നുള്ളാൻ കേന്ദ്രസർക്കാർ. എക്‌സൈസ് നയം സംബന്ധിച്ച കേസിൽ മനീഷ് സിസോദിയക്കെതിരേ എഫ്.ഐ.ആർ രജിസ്റ്റർ ചെയ്തതിന് പിന്നാലെ ഡൽഹി സർക്കാർ 1,000 ഡി.ടി.സി ലോ ഫ്‌ളോർ ബസുകൾ വാങ്ങിയതിലും സി.ബി.ഐ പ്രാഥമികാന്വേഷണം തുടങ്ങി.
മനീഷ് സിസോദിയക്കും കെജ്‌രിവാളിനുമെതിരേ ബി.ജെ.പിയും കേന്ദ്രസർക്കാരും തുടർച്ചയായി ആക്രമണം നടത്തിക്കൊണ്ടിരിക്കുന്ന പശ്ചാത്തലത്തിലാണ് സി.ബി.ഐ മറ്റരന്വേഷണം കൂടി നടത്തുന്നത്. അഴിമതിക്കെതിരേ പോരാടി അധികാരത്തിലെത്തിയ ആംആദ്മി സർക്കാരിനെ തുടർച്ചയായി അഴിമതിക്കേസുകളിൽ കുടുക്കാനാണ് ബി.ജെ.പി നീക്കം. ബി.ജെ.പിയുടെ ബഹുതല ആക്രമണത്തെ ആംആദ്മി പാർട്ടി എങ്ങനെ അതിജീവിക്കുമെന്നാണ് രാഷ്ട്രീയ നിരീക്ഷകർ നോക്കുന്നത്.

ഡൽഹി ലെഫ്റ്റനന്റ് ഗവർണർ വി.കെ സക് സേനയുടെ നിർദേശപ്രകാരമാണ് ബസുകൾ വാങ്ങിയതിലും അറ്റകുറ്റപ്പണിക്ക് കരാർ നൽകിയതിലും അഴിമതിയുണ്ടെന്ന ബി.ജെ.പി ആരോപണം അന്വേഷിക്കാൻ സി.ബി.ഐ തയാറായിരിക്കുന്നത്. അഴിമതി ആരോപണത്തിന് ഒരുവർഷത്തിലധികം പഴക്കമുണ്ടെങ്കിലും ഇപ്പോഴാണ് അന്വേഷണം. കഴിഞ്ഞവർഷം ഒാഗസ്റ്റിലാണ് ബി.ജെ.പി ഈ വിഷയത്തിൽ സി.ബി.ഐക്ക് പരാതി നൽകിയത്.
ലെഫ്റ്റനന്റ് ഗവർണറായിരുന്ന അനിൽ ബൈജാൽ പ്രാഥമികാന്വേഷണത്തിന് സമിതിയെ നിയോഗിക്കുകയും ചെയ്തു. എന്നാൽ, ഒരുവർഷം ലഭിച്ചിട്ടും സി.ബി.ഐ പ്രാഥമികാന്വേഷണം പോലും നടത്തിയില്ല. ആംആദ്മി പാർട്ടിയെ പിളർത്താനും അതുവഴി ഡൽഹിയിലെ സർക്കാരിനെ അട്ടിമറിക്കാനും ശ്രമിച്ച് പരാജയപ്പെട്ടപ്പോഴാണ് സിസോദിയയെ കേസിൽ കുടുക്കിയതെന്നാണ് ആംആദ്മി പാർട്ടി പറയുന്നത്. ആംആദ്മി വിട്ട് ബി.ജെ.പിയിൽ ചേർന്നാൽ മുഖ്യമന്ത്രി പദവി നൽകാമെന്ന് മനീഷ് സിസോദിയക്ക് ബി.ജെ.പി വാഗ്ദാനം നൽകിയിരുന്നു. എന്നാൽ, സിസോദിയ അതിന് വഴങ്ങിയില്ലെന്ന് ആംആദ്മി വക്താവ് സൗരബ് ഭരദ്വാജ് ആരോപിച്ചു.
ഗുജറാത്ത് തെരഞ്ഞെടുപ്പ് മാത്രമല്ല, ഡൽഹിയിലെ വിദ്യാഭ്യാസമേഖലയിൽ ആംആദ്മി സർക്കാർ നടത്തുന്ന പ്രവർത്തനങ്ങൾ അന്താരാഷ്ട്രതലത്തിൽ ശ്രദ്ധയായതോടെയാണ് തങ്ങളെ കേന്ദ്രസർക്കാർ ആക്രമിക്കാൻ തുടങ്ങിയതെന്നും ആംആദ്മി പാർട്ടി ആരോപിക്കുന്നുണ്ട്. ഡൽഹിയിലെ വിദ്യാഭ്യാസമേഖലയിലെ നേട്ടങ്ങളെക്കുറിച്ച് ന്യൂയോർക്ക് ടൈംസിന്റെ ആദ്യപേജിൽ ലേഖനം പ്രത്യക്ഷപ്പെട്ടതിന് പിന്നാലെയാണ് തന്റെ വീട്ടിൽ റെയ്ഡ് നടന്നതന്ന് സിസോദിയയും പറയുന്നു. ന്യൂയോർക്ക് ടൈംസ് വാർത്ത പെയ്ഡ് ന്യൂസാണെന്നാണ് ബി.ജെ.പിയുടെ മറുപടി.